Topeta
Ła Topeta ła ze na inbarcasion a fondo piato tìpega de ła tradision łagunar veneta. Grasie a łe ridote dimension e a ła discreta capiensa ła ze zornalmente utiłizada co motor forabordo par uzo diportistico (capiensa consentìa 6 persone) e par el strapòrto de picołe rate de mercansìe. Ła pol esar armada co veła a'l terso ma ła pol esar spenta anca a remi.
Se trata de na variansa de dimension più ridote de ła topa; come 'st'altra ła topeta ła ga un anpio specio de pope, łargo poco manco de ła larghesa màsema de l'intiera inbarcasion e prategamente perpendicołar a'l pian de gałezamento. Ła ga bande alte a prova anpia e afuzołada.
El material tradisional par ła costrusion de'l scafo el ze el łenjo e ła só łaorasion ła rechiede l'uzo de forme e piegadùre a caldo. Resentemente, vista ła versatiłità e el suceso de cui gode 'sto tipo de inbarcasion i costrutóri i recore senpre più de frecuente a l'utiłizo de ła veroraza.