Cel

Cel
	Celnan di ciboyo cora bou di microscop. Celnan bibo cu vacuolo (blas yena cu likido) di color, celnan morto cu vacuolo sin color, bubbel di aire cu rand preto diki.
Clasificacion
MeSH	D002477
	Imagennan riba Wikimedia Commons
	[Edita Wikidata] · [Manual]

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Den biologia, e cel ta e unidad structural y funcional fundamental di tur organismo. E ta considera como e componente di mas chikito cu por manifesta bida independientemente. Celnan ta clasifica principal den dos tipo: prokaryote y eukarya.

E termino cel ta deriva di e palabra Latin cellula cu ta nifica "camber chikito", un referencia na nan aparencia bou di microscop. Mayoria di cel ta microscopico y a wordo observa pa prome biaha pa Robert Hooke na 1665.

Organismonan por wordo clasifica segun e cantidad di cel cu nan ta consisti. Esnan forma pa un cel singular ta yama unicelular, esaki ta e caso cu protozoa of bacteria, mientras cu organismonan forma pa multiple cel ta conoci como multicelular. E cantidad di cel ta varia enormemente, di algun shen, manera den cierto bichi (Nematoda), pa shen y tanto triyon ( $10^{14}$ ), manera den hende. Tipicamente, celnan ta midi un diameter di mas o menos 10 micrometer y ta pisa rond di 1 nanogram, aunke celnan significamente mas grandi tambe ta existi.

Teoria di cel, formula entre 1838 y 1839 door di Matthias Jakob Schleiden (pa mata) y Theodor Schwann (pa animal), a declara cu tur organismo bibu ta consisti di un of mas cel, cu e cel ta e unidad fundamental di structura y funcion den organismonan bibu, y cu tur cel ta surgi for di celnan existente caba. Ademas, e ta sostene cu funcionnan vital ta surgi for di e actividad di celnan y for di interaccion entre celnan. E informacion herediario ta deposita den e DNA.

E origen di e prome organismo na Tera tin lasonan fuerte cu e origen di e prome cel. Aunke tin varios hipotesis tocante con exactemente esaki a sosede, ta wordo accepta generalmente cu e proceso a cuminsa cu e formacion di moleculenan organico for di substancianan inorganico bou di condicionnan ambiental faborabel. Siguientemente, e biomoleculenan aki lo a organisa den structuranan mas compleho capasita pa auto-replicacion.

Historia

E dearoyo di biologia celular ta pegapega cu avancenan tecnologico cu a haci e estudio di cel posibel. E prome bista riba morfologia di cel a surgi den siglo dieshsete, danki na e fomentacion di microscop simplistico. Den siglo diesnuebe y binti, e estudio a refina cu varios tecnica histologico pa microscopia di luz. Durante siglo binti, resolucion a aumenta fuertemente debi na e uzo di microscopia electronico, microscopia di fluorescencia, y microscopia confocal. Ademas, e binida di tecnicanan molecular, basa riba e uzo di zuur nucleico y enzymnan, a permiti analisis mas profundo di procesonan celular.

Descubrimento

Robert Hooke, kende a inventa e termino "cel".

Dibuho di e structura di korki manera observa pa Robert Hooke bou di su microscop.

E prome pasonan den investigacion celular a wordo tuma den siglo diesshete, despues di e invencion di e prome microscopnan na fin di siglo diesseis. E instrumentonan aki a permiti investigadonan haci tur tipo di observacion cu a conduci na un comprondemento di cel structural denter di dos siglo di tempo. Aki bou tin un bista cronologico di algun descubrimento importante:

1665: Robert Hooke a publica su observacionnan pa cu tehido di mata, manera korki, uzando un microscop di 50 be cu el a construi su mes. El a nota un ripiticion di structuranan, manera esnan cu abehanan ta construi pa deposita nan honing, y a yama e unidadnan aki "celnan". Sinembargo, Hooke a observa solamenta celnan morto y no por a describi nan struktura interno.
1670: Antonie van Leeuwenhoek a observa varios cel eukarya (manera protozoa y spermatazoa) y prokaryote (bacteria).
1745: John Needham a describi presencia di organismonan unicelular.
Decada di 1830: Theofor Schwann a studia celnan di bestia. Hunto cu Matthias Schleiden el a propone cu celnan ta e blokinan fundamental di ambos mata y bestia, y cu nan ta na e fundeshi di tur proceso di bida.
1831: Robert Brown a descubri e nucleo di cel.
1839: Jan Evangelista Purkyně a describi e cytoplasma di cel.
1857: Rudolf Kölliker a identifica e mitocondria.
1858: Rudolf Virchow a formula e principio cu tur cel ta surgi for di celnan existente caba.
1860: Louis Pasteur a conduci numeroso estudio tocante e metabolismo di yeast y e funcion di sterilisacion.
1880: August Weismann a mustra cu celnan moderno tin similaridadnan structural y molecular cu celnan di tempo antiguo.
1931: Ernst Ruska a construi e prome microscop electronico di transmision na Universidad di Berlin. Cuater aña despues el a logra dos be e resolucion di un microscop di luz.
1981: Lynn Margulis a publica su obra tocante e origen di cel eukaryotico, The Origin of Eukaryotic Cells.

Caracteristica

Celnan ta sistemanan termodynamico compleho cu propiedadnan structural y funcional comun cu ta permiti nan sobrevivencia. Sinembargo, diferente tipo di cel ta expone variacion riba e caracteristicanan comun aki, loke ta permiti specialisacion funcional y aumento di complexidad. Esaki ta tene celnan altamente organisa (orden), na costo di entropia (desorden) aumentativo di nan ambiente (p.e., dioxido di carbon), un rekisito fundamental pa bida.

Structura

Individualidad: Cada cel ta rondona pa un plasma membrana (capa externo) cu ta separ'e for di e ambiente. E plasma membrana por diferencia pa tipo di cel. Den celnan di animal e ta un capa dobel di moleculenan di vet (lipid). Den cel di mata y beskem tin un membrana extra fuerte di sucu (polysacharide). Den e cel di bacteria e membrana ta consisti di substancianan manera peptidoglycan of lipopolysacharide, y archaea su membrana ta componi diferente y ta varia hopi. E cobertura ta proteha e cel, ta permiti'e comunica cu su ambiente, ta regula loke drenta y sali, y ta yuda mantene un diferencia electrico entre e parti paden y pafo di e cel (e potencial di membrana).
Cytosol: E likido intracelular unda e organelnan ta situa.
Material genetico: Tur cel ta contene DNA como material hereditario cu instruccion pa funcionamento di cel, y RNA necesario pa e exprecion di e informacion genetico.
Metabolismo: Celnan ta posee enzym i otro proteinanan, pa sostene, huntu cu otro biomoleculenan, un metabolismo activo.

Referensia

E artíkulo aki òf un vershon anterior di dje ta un tradukshon di e artíkulo Cel riba e Wikipedia spañó, ku ta kai bao di e lisensia Creative Commons Attribution/Share Alike. Mira e historia di edishon einan.