好奇

隻貓好奇想知部洗衣機裏面有啲乜，仲捐埋個頭入去睇（探索行為）。

好奇（粵拼：hou3 kei4；拉丁文：cūriōsus）係指想要獲得資訊或者知識而起嘅一系列行為同情緒反應。好奇算係心理狀態，亦可以當係情感嘅一種，會驅使好奇嘅個體去探索引起好奇心嘅事物，而個個體往往會因此得到更多嘅資訊同知識。

基本定義

19 世紀細菌學家佐治·納駝喺度用顯微鏡觀察件樣本，展示其好奇心。

睇埋：情感同認知

喺心理學定義上，情感可以泛指啲同動機相關嘅身心狀態，每種情感都會對應某類特定嘅刺激，亦會對應某拃特定嘅身心變化，令個人有動機去做某啲行為。舉例說明，驚係一種情感－

• 刺激：一隻動物會驚，通常係因為感知到啲危險嘢；
• 身心變化：隻動物驚，就會心跳加快同埋對眼擘到大一大；
• 動機行為：佢往往會有股強嘅動力想逃走，遠離令佢驚嘅刺激。

而响心理學上，心理學家噉樣描述好奇感，原版係英文，以下譯作粵文：

（好奇係）股（令人）趨向更優良認知嘅衝動。

（好奇係）一股操作性質嘅動力—會引導生物做出唔會帶嚟咩具體犒賞嘅解謎行為。

（好奇係）一股受引起嘅認知缺乏感，源於感知到（自己）响知識同理解上有罅隙。

基於呢啲描述，好奇就可以噉嚟想像：

• 刺激：源於動物感知到一啲認知上有刺激性嘅事物。
• 身心變化：動物覺得好奇嗰陣，唔會好受壓，彷彿好似件事物係犒賞噉；
• 動機行為：佢仲會有探索行為，會（例如）行埋引起佢好奇嗰件事物度，想睇清楚啲件事物。

心理學、神經科學同動物行為學等嘅領域都有對好奇感做研究，會想知（例如）人覺得好奇嗰陣，佢個腦裏面發生緊啲乜變化。而且人工智能領域嘅工作者，仲有嘗試教電腦展現出好似人同第啲動物噉嘅好奇行為。

起因刺激

刺激有以下呢啲特性，被指係容易引起好奇感：

• 新穎：亦可以睇吓不匹配負向波嘅概念。
• 不確定性
• 衝突
• 複雜

探索行為

睇埋：趨近行為、學習同玩

探索行為係行為一種，指人類或者第啲動物主動去接觸、觀察同試驗未曾認識過嘅事物。呢種行為通常唔係直接為咗即時生存，即係並非為咗搵嘢食或者避開危險，而係為咗獲取資訊，了解世界點樣運作。由心理學角度睇，探索行為係好奇心嘅外在表現—人對某樣事物有不確定感或者知識上有空白嗰陣，好多時就會引發好奇感，繼而推動佢去做出探索行為。

人工好奇

睇埋：強化學習同強人工智能

強化學習可以結合人工好奇嚟用：喺廿一世紀初，人工智能最大嘅弱點係專化得滯，教人工智能幫手睇病，佢唔會識得（例如）做法律相關嘅判斷，但由現實經驗可知，人有能力學完一樣嘢之後走去學第樣；其中一個重要原因係，人有好奇心－手上資訊唔夠嗰陣，人好多時都會主動去搵新嘅資訊吸收；於是有人工智能研究者就提出咗人工好奇嘅概念，主張要用電腦模擬人類嘅好奇心，噉樣人工智能就唔使吓吓都要人類畀資訊，而係會識得自己搵資訊吸收。

對於人工好奇嘅概念，有人就舉咗個噉嘅例子：

• 想像家陣有個人喺超市裏面兜圈噉行，想搵菠菜；
• 喺每一步，個人都行經幾排貨架，呢啲貨架上面並冇菠菜；
• 如果個人係跟簡單強化學習行事嘅，佢會一路「周圍貨架冇菠菜，冇任何一個選項得到強化」，進入永世都唔會離開個圈嘅狀態；
• 但假如個人具有好奇心嘅能力，曉（例如）有動機想探索未行過嘅路線，隨機噉揀條圈以外嘅路線行－就有可能最後搵到菠菜，或者最少脫離係噉兜圈嘅狀態。

有研究者指，呢點就係缺乏好奇心嘅人工智能嘅問題所在－冇好奇心嘅智能體，一定要有人提供有用嘅資訊或者環境佢，先會有能力成長，但喺現實，人成日都會面對「周圍環境冇咩有用資訊」噉嘅情況，要自己去搵資訊；而好奇心正正就係能夠「令人自發噉去搵有用資訊」嘅嘢。要達致人工好奇，強化學習演算法起碼要有以下嘅嘢：

• 段演算法要有記憶能力，能夠記住過往嘅經驗；
• 段演算法要識得將「而家呢刻觀察到嘅嘢」攞去同記憶入面嘅片段對比；
• $R_{a}$ 唔淨只取決於一個行動能唔能夠達到目的，仲要或多或少噉取決於「件行為帶嚟嘅觀察有幾新穎」（詳情可以睇返好奇感啲起因）。

呀噉。

心理相關

• 知識
• 性格
• 創意
• 開放度
• 認知需要

垃雜相關

• 求知
• 創新
• 稱奇感
• Teaser
• 開放世界

文獻

英文文獻：

• Berlyne, D. E. (1950). Novelty and curiosity as determinants of exploratory behaviour. British journal of psychology, 41(1), 68.
• Burda, Y., Edwards, H., Pathak, D., Storkey, A., Darrell, T., & Efros, A. A. (2018). Large-scale study of curiosity-driven learning (PDF). arXiv preprint arXiv:1808.04355.
• Cen, D., Teichert, E., Hodgetts, C.J. and Gruber, M.J., 2024. Curiosity shapes spatial exploration and cognitive map formation in humans. Communications Psychology, 2(1), p.129，呢份研究用咗虛擬實境實驗，發現人嘅好奇相關特質，會影響佢哋有幾傾向喺虛擬空間入便四圍移動，探索個環境。
• Ciolfi, L., & Bannon, L. (2002, September). Designing Interactive Museum Exhibits: Enhancing visitor curiosity through augmented artefacts. In Eleventh European Conference on Cognitive Ergonomics (Vol. 7).

拎

• （英文） 人工智能點樣變得有好奇心？，Towards Data Science（譯：通向數據科學）