KISS 原則

英文語句 keep it simple

KISS 原則係程式編寫同相關工作上嘅技巧。呢條原則講緊，如果有多過一種方法可以達到想要嗰種效果，噉就應該採用最簡單嘅方法。一般認為，程式盡可能簡單嘅話，可以令個程式更易用。而且做較大型嘅軟件工程項目嗰陣，若果編程員按 KISS 原則做事，同一團隊嘅編程員接手嗰時就會更輕鬆順利。

KISS 原則個名源自英文，全名係：Keep It Simple, Stupid，呢句說話意思係將件嘢整得簡單啲呀，死蠢噉解，而 KISS 就係其簡寫。

實際例子

舉個簡單例子，想像而家要寫子程式，用嚟判斷手上嘅數係咪正數。做編程嘅人可以噉寫（虛擬碼）：

 FUNCTION hai_mai_zing3sou3(x)
   如果 x 等於 0:
     俾結果：False
   否則如果 (x × -1) 大過 0:
     俾結果：False
   否則如果 (x − 1) 大過 -1:
     俾結果：True
   否則:
     俾結果：False
 END FUNCTION

呢種做法的確可以準確解決問題，但係再想像以下嘅做法：

 FUNCTION hai_mai_zing3sou3(x)
   俾結果：(x 大過 0) 係咪真
 END FUNCTION

兩段碼做到同一個效果，不過第二段更簡單直接，行hong4數少，冇多餘嘅如果結構，易寫易明，就比較符合 KISS 原則。

呢條原則有個經典例子。想像而家工程師要設計戰機，然後提出個挑戰：佢設計架戰機，希望要夠簡單，普通嘅維修員喺戰場環境下用幾件工具就可以做維修；條原則話「愚蠢」意思就係話若果設計得太複雜，緊急嗰陣維修員就唔能夠現場做維修－設計師扮晒高深，採用複雜嘅設計，但係設計出嚟件產品最後冇實際用途。噉嘅例子被指係反映緊一點：簡單就實用。

電腦模擬相關嘅研究亦有提到，科研上嘅模型（好似個體為本模型）好多時簡單就好：實作嘅研究表明，好多望落極其複雜嘅規律，查實可以由簡單嘅行為定律嗰度創發出嚟。因此，科學家整電腦模擬模型嗰陣，大可以（甚至應該）追求做到模型入便嘅運作定律要有咁簡單得咁簡單－就係 KISS 原則嘅主旨。

KISS 唔係話任何時候都唔可以複雜，而係指只要夠用，就唔好設計得太過頭。

唔同版本

有啲人覺得原本嗰個版本嗌聽嗰個人做死蠢，好似唔係咁好，所以 KISS 句嘢有咗第啲版本：

• "Keep it super simple" 意即「保持極度簡單」 → 極簡為上
• "Keep it simple, silly" 意即「保持簡單啦，傻瓜」 → 簡單啲啦，戇居仔
• "Keep it short and simple" 意即「保持簡短同簡單」 → 簡短又簡單
• "Keep it short and sweet" 意即「保持簡短又悅目」 → 短小精幹
• "Keep it simple and straightforward" 意即「保持簡單同直接」 → 簡單直接
• "Keep it small and simple" 意即「保持細小同簡單」 → 細細件，簡簡哋
• "Keep it simple, soldier" 意即「保持簡單啦，士兵」 → 簡單啲啦，阿兵哥
• "Keep it simple, sailor" 意即「保持簡單啦，水手」 → 簡單啲啦，水手
• "Keep it simple, sweetie" 意即「保持簡單啦，乖仔」 → 簡單啲啦，乖仔
• "Keep it sweet and simple" 意即「保持悅目又簡單」 → 又靚又簡單

等等。

類似概念

唔少領域嘅思考都會用到「簡單就係好」或者類似嘅諗法，例如係：

• 奧坎剃刀：科學哲學概念，簡單講係如果有多個解釋同樣咁合理，通常最簡單嗰個就最可能係真。
• 優雅：美學上係指因為簡單而有嘅美，形式同功能之間達致和諧平衡。
• 切勿重新發明車轆：工程學上提到嘅諗法，講緊已有好方法就唔使再由頭諗過。

睇埋

• 軟件建造
• DRY 原則
• 複雜度
• 可用度
• 極簡主義