建丘白蟻

廿一世紀初响澳洲一角影到嘅白蟻丘

建丘白蟻係一類嘅白蟻物種，特徵係識建造白蟻丘（英文：mound，近似粵拼：maang1）並且成群噉住喺丘入便。建丘白蟻會用泥、白蟻口水同埋糞便溝埋一齊嚟起丘，通常會起喺排水良好嘅地方，直徑可達三十米。呢啲白蟻主要分佈喺非洲、澳洲同南美洲。

白蟻丘都有「生死」，好多時就算住喺佢哋入便嘅白蟻群體死晒，個白蟻丘都仲喺度。如果白蟻丘入便嘅隧道露咗出嚟，通常就代表個丘已經唔再有活動。有時起丘嘅白蟻死晒之後，其他白蟻群體（可能係同一物種，亦可能係唔同物種）會遷入佢哋留低嘅丘。

學名詞彙

M. natalensis 起嘅白蟻竇嘅結構圖

文中提到嘅物種嘅學名：

• 土白蟻：Odontotermes
• 大白蟻：Macrotermes
• 黑塚白蟻：Amitermes
• 齊白蟻 (暫譯) ：Syntermes

丘嘅結構

一九七〇年代响非洲塞內加爾影到嘅白蟻丘

〇八年喺印度淡米爾納德邦一角，有個人企咗喺個白蟻丘側邊影相。

白蟻丘嘅結構可以非常複雜。丘入面有龐大嘅隧道同導管系統，起到為巢穴通風嘅作用。為咗令通風效果更好，白蟻會建造通道，通向巢穴底下嘅地窖。成個丘起喺地下巢穴之上。巢穴本身係球狀結構，由大量巢室組成，形狀同大細都有好多唔同款式。有啲物種，例如土白蟻會喺丘入面建造開放式嘅煙囪或者通風口；又有一啲例如大白蟻就會建造封密嘅丘。而黑塚白蟻起嘅丘通常又高又幼。

白蟻丘入面有複雜嘅地道同通風道系統，而科學家一直認為噉嘅系統有助調節白蟻丘入便嘅氣溫。事實表明，白蟻丘能夠調節自己內部嘅溫度、濕度，甚至氧氣同二氧化碳等呼吸氣體嘅分佈。由於白蟻嘅新陳代謝會產生熱，呢股熱令丘入面嘅空氣有足夠浮力向上升，推到去白蟻丘嘅上層，最終經過丘表面嗰個佈滿咗窿嘅牆體，同外便嘅空氣交換熱同氣體。

以昆蟲建造嘅結構嚟講，白蟻丘非常龐大：根據健力士世界紀錄，最高紀錄試過搵到有個白蟻丘去到成 8.7 米咁高。

研究：巴西東北部嘅白蟻

有人喺巴西東北部做過研究，估計當地有大約兩億個白蟻丘，散佈喺一笪面積同英國差唔多咁大嘅地方，當中有啲丘去 3 米高 10 米闊，平均每隔 20 米就有一個。呢啲丘底下仲有成個地下隧道網絡，要掘晒佢哋出嚟估計要掘成十立方公里咁多嘅泥。

科學家試過攞其中 11 個丘去做放射性定年，結果最「後生」嗰個都有成 690 年歷史咁耐，而最老嗰個就起碼有 3,820 年。呢啲丘係由齊白蟻屬嘅白蟻起嘅，佢哋身長大約半吋。據估計，呢批白蟻丘可以話係地球上首次，有單一昆蟲物種做到咁大型嘅「生物工程項目」。

社會分層

睇埋：真社會性

白蟻具有真社會性。如果話一個群體有真社會性，意思係話啲成員會合作一齊照顧啲幼體，而且成年個體會分做識繁殖同唔識繁殖，兩組之間有分工。一竇白蟻會分做工蟻、兵蟻同埋蟻王蟻后三大「階層」：

• 工蟻：三者中最細隻嘅，亦係成個蟻群入面數量最多嗰類個體。佢哋全部都係盲嘅、冇翼，而且喺性方面唔成熟。工蟻嘅主要工作係負責搵嘢食同水、掘地道嚟擴充個白蟻竇，而非工蟻嘅白蟻唔識做呢啲嘢，所以就要靠工蟻嚟養起佢哋。因此，工蟻對成個竇嘅生存嚟講不可或缺。
• 兵蟻：負責「當兵」，即係要保護成個蟻群，對付入侵白蟻竇嘅動物；大隻嘅兵蟻發動攻擊嗰陣，佢哋會釋出帶有腐蝕性嘅唾液，喺打開嘅大顎中間傳開；而佢哋咬敵人嗰時，呢啲液體會沾落對方度，造成傷害，而且呢種液體接觸空氣之後好多時會凝固，變到好似膠水噉。
• 蟻王蟻后：蟻王蟻后一公一乸，最大特徵係有生殖能力，會係噉交配，當中蟻后體型巨大，可以去到成 6 厘米咁長，會大量噉生蛋，維持個竇嘅白蟻數量。

如是者，工蟻一路工作同擴充白蟻竇，蟻王蟻后一路繁殖增加數量，順利嘅話個白蟻群就會一路擴張。

睇埋

• 蟻竇
• 蜜蜂竇
• 超生物

拎

• （英文） 白蟻/巢穴，不列顛百科全書講唔同白蟻物種住咩竇，當中有講白蟻丘。
• （英文） 引人入勝嘅白蟻建築學，BBC 出咗段影片講白蟻丘。
• （英文）（中文） 解碼自然：受到白蟻丘啟發，呢棟非洲大樓唔使冷氣就能夠「自然涼」！，呢段片講英語，帶繁中書面語字幕。佢哋提到就連人類嘅建築設計都有受白蟻丘啟發。