Benutzer:Locki172/Schlaming

Schlaming is a östarreichische Schistodt in da Steiamoak.

Låg

Schlaming liegt im owan Ennstoi in da Steiamoak, do wo da Toiboch in de Enns rinnt. Im Noadn siacht ma in Dochstoa und intabei san de Niedan Tauan. D’Nochboagmoahn san Romsau am Dochstoa (Ramsau am Dachstein), Haus, s Rohmous (Rohrmoos-Untertal) und Pichi (Pichl-Preunegg).

Auf de 10,3 km³ lebn 4.570 Leit (Stond 2001). Schlaming liegt auf 706 m.

Geschichte

D’erste urkundliche Erwähnung vo ana Siedlung auf dea Stöh woa im Joah 1180. 1304 is Schlaming a Moarkt woan, s Stodtrecht is donn 1322 verlichn woan. Domois hod da Beagbau in Schlaming richtig aufblüht. 1500 Bergknoppn hom fia Süwer (Silber), Blei, Kupfa, Koboit und Nickl gschepft. Im Joah 1525 iss za an großn Bauernaufstond kemman, danoch is Schlaming hibsch komplett hingmocht woan und des Stodtrecht is eana wieda oberkonnt woan. Im Laufe van 19. Joahrhundert is da Beagbau noch und noch eigstöht woan.

Eascht durchn Fremdnvakehr, wo d’Fremdn seitn Eisnbohbau ob 1875 auf Schlaming kemman san, hod Schlaming wieda an Nom. 1925 hod donn des Winterspuatzentrum des Stodtrecht wiedagriagt.

Glaubn

Va de Schlaminger san 55,6% römisch-katholisch und 34,2% evangelisch. Moslems homma 4,1%, 4,3% san ohne Bekenntnis. Do bleim donn no 1,6% üba, de sunst no an wos ondas hoid glam.

Spuat

Der Winterspuat wiad in Schlaming gonz groß gschrim. De easchte Schihittn, de Hochwuaznhittn is 1920 earichtet woan, dea easchte Lift is donn 1953 auf da Planai baut woan. Bsundane Haileits (Highlights): - 1908. hom si si zan Schivabond zaumdo. - Des easchte Schiwödkaprennan (Skiweltcuprennen) in 1973. - De Alpine Skiwödmeisterschoft 1982 - De 5. Speschl Olümpiks (Special Olympics) 1993 Fescht hom si si fia d’Schiwödmeistaschoft va de Schifoahra 2009 beworbn. Woa nix. Eppa klopts snexte moi.

Wiatschoft

Mid knopp 70 % hod da Winterspuat eideutig die Obahond. Üba 270.000 Nächtigungen hods in der Saison 2002/03 gem. Im Summa drauf woans hingegn nua um de 120.000 Übanächtigungen. In da Gmoa söba gibts hibsch 3500 Fremdnzimmabettn. Kemman dans vo da gonzn Wöd.

4-Berge-Schischauki Fia d’Fremdn san de viar Schiberg, wo va oan zan ondan a Lift aufigeht am gutestn. De Reitaoim, de Hochwuazn, de Planai (oiso Fostnbeag) und da Kaibling in Haus san midnond vabundn.

Dea Gipfi der Saison is imma der Nochtslalom „Nightrace“ (Naitreißß), do wo jeds Joah 40.000 Leit zan eawoatn san. Oba in Schlaming gibts nid nur den Fremdnvakehr as Wiatschoftsfaktor, sondern a des Schlaminger Bier: Die Schlaminger Brauarei is 1909 as easchte oipnländische Voiksbrauerei gegründet woan, und hod seit dem scho a poar moi an Preis gwunga.