Bîn-cho̍k

Bîn-cho̍k (Hàn-jī: 民族) sī chi̍t khoán lâng ê chi̍p-thé, siông-sè ì-sù chē khoán jî-chhiáⁿ mā koh ē toè sî-kan lâi kái-piàn. Bîn-cho̍k ê khài-liām pí cho̍k-kûn khah thiu-siōng jî-chhiá khah chèng-tī-sèng kiam hui-kò-jîn-sèng--ê. Ta̍k ê bîn-cho̍k tiāⁿ ū in ka-kī ê khí-goân sîn-oe kah le̍k-sú, lēng-gōa iáu ū kāng-khoán ê bûn-hòa, tē-iân kah gí-giân.

Iōng-gí

"Bîn-cho̍k" chit jī sī kīn-tāi tùi se-iûⁿ giân-gí pí-lūn Eng-gí nation ê hoan-e̍k, tāi seng lâi-goân sī Hoat-gí ê nacion, ū "chhut-siⁿ" (naissance), "chhut-sin-tē" ê ì-sù. Gí-goân sī Latin-gí ê natio, chiàu-jī ì-sù tio̍h sī "chhut-siⁿ".

Bîn-cho̍k, chiàu nation ê ēng-hoat, ia̍h ū óa-kīn "kok-ka" ê ì-sù, pau-koat chú-khoân/chèng-tī-sèng--ê kok-ka (state) kap tē-lí-sèng--ê kok-ka (country).