Bân-oa̍t
Bân-oa̍t (Hàn-jī: 閩越 / 閩粵; Bân-tang-gí: Mìng-uŏk; Bân-pak-gí: Mâing-ṳ̆e; Phô͘-sian-gí: Máng-e̤̍h), mā hō-chò Bân-oa̍t-kok (閩越國) kap Bû-chu-kok (無諸國), sī chi̍t ê Hok-kiàn ê kó͘-chá ông-kok. Bân-oa̍t sī Pah-oa̍t Bân-oa̍t-cho̍k kiàn-li̍p ê kok-ka. Bân-oa̍t tī kong-goân chiân 202 nî khai-sí ê 60 chì 70 nî chi-kan, kok-le̍k ta̍t-kàu téng-sēng, sī hit-tong-sî Hàn-tiâu tang-lâm-bīn siōng kiông-sēng ê kok-ka chèng-koân. Bân-oa̍t-ông Bû-chu tī Siâⁿ-chhun kiàn-li̍p ê Ông-siâⁿ sī hit-tong-sî Tiong-goân tang-lâm-hong siōng-tōa ê siâⁿ-chhī.
Le̍k-sú
Khí-oân
Kun-kù khó-kó͘ kap bûn-hiàn gián-kiù, Bân-oa̍t ê ki-chhó͘ sī chāi-tē goân-chū-bîn bûn-hòa, in sī Pah-oa̍t ê chi̍t hūn, tī 3000 tang-chêng, siong-tong Tiong-goân sī Siong/Chiu ê sî-tāi, chiō í-keng sán-seng--ah. Kàu Chiàn-kok sî-tāi, koh chìn chi̍t pō͘ lām ji̍p chá-chêng hō͘ Chhó͘-kok siau-bia̍t ê Oa̍t-kok î-cho̍k, xkàu hit chūn Bân-oa̍t chūn-bîn ê chú-thé oa-ná sī chāi-tē goân-chū-bîn.[1]
Bân-oa̍t-kok ê kiàn-li̍p
Chiàu Sú-kì tùi Bû-chu chò Bân-oa̍t-ông ê kì-su̍t, ē-tàng chai-iáⁿ tī Chîn-kok cheng-ho̍k chìn-chêng, Bân-oa̍t í-keng ū kok-ka chèng-khoân ê chûn-chāi.[1]