Trator

Al trator (da 'l latin thraere, tirar, al ciapa al so nome anca associà a la parola motor, deventando la contražion de ste doi) al è an međo doperà par tirar an rimorchio o inganciar atreži specifici par la agricoltura. Al fa parte de le machine agricole che le se mou, de le quai al costituiss la conponente trainante. Al tator al è nassest de 'l lontan 1892 te i Stati Uniti. I primi modei i era fadigosi da manovrar e i pesea forte. Al trator, definì come "central mobile de potenža", al à costituì al punto forte de la mecanizažion agricola e de la agricoltura moderna. te i so pì de 100 ani de storia, al trator al se à miljorà, potenžià e conpletà. Difati al mejorament e la invenžion de nove tecnologie le à conpagnà al trator, permetendoghe de ciapar na inportanža senpre pì granda. I ultimi esenpi de trator i è vere e proprie opere de inđegno tecnologico, che le ofre ogni tipo de comodità a 'l operador che al le dopera, fando sparagnar le operažion rognose e fadigose. Co 'l passar de 'l tenp al trator al se à adeguà a tute le esigenže de i utenti e a tuti i tipi de atreži, ofrendo na fassa de aplicažion senpre pì granda. La introdužion de novi dispositivi e organi come al solevator, la presa de forža, la dopia tražion e avanti cossì, i à deslontanà i limiti de 'l trator, fandolo deventar la machina agricola par ecelenža. I primi trator i era le locomobili a vapor, po' i primi trator co motor a conbustion interna a petroljo co aviamento a bensina, podopo i trator a testa calda, po' i trator a nafta. I primi trator i gnea doperadi pì che sia par arar i canp, ma in seguito i se à mostrà adati anca par far ndar machine grosse fisse (es: la trebia) tramite na cinghia pjana de curan. Ten quei ani le strade le era bianche e le rode le era fate de fer. A redoss de i ani '40 al è stat fat i primi trator destinadi a la tražion su strada, aumentando cossì le velocità massime e dotandoli de gabine par al guidador e de rode de gomna. Senpre ten quei ani è stat inventà i primi trator cingoladi par ndar mejo a moerse ten teren moji.