Sardu nugoresu
Articulu in nugoresu
Su nugoresu est su limbazu chi si faveddat in sa bidda de Nùgoro. Ischirriande su sardu in duas macrovariantes su nugoresu diat resurtare unu limbazu logudoresu, mancari b'at fenòmenos morfolòzicos e fonèticos chi l'acurtzian fintzas a su campidanesu, e in su lèssicu nugoresu b'at paràgulas meda chi bi sun in campidanesu puru. Mancari Nùgoro siat in Barbàgia, su nugoresu no est unu limbazu barbaritzinu, comente sun imbetzes sos limbazos de sas biddas chi sun a làcana a Sud: su mamujadinu, s' ulianesu e s' orgolesu. Sos limbazos chi s'assimizan de prus sun sos de sas biddas chi bi sun a Ponente: Oroteddi, Onieri, Orane e Sarule, sas diferèntzias de pronùntzia chin custos limbazos sun pacas. In sas biddas chi bi sun a Nord-Ovest, Benetuti, Nule e gai sichinde si faveddat su costerinu, chi est a midade tra su nugoresu e su logudoresu. A nord b'at Orune chi tenet unu limbazu suo chind una pronùntzia diversa dae sas àteras biddas chi tenet acurtzu, ma b'at cosas chi s'assimizan a su nugoresu, a su costerinu e a su bitichesu. Sas àteras biddas chi bi sun a nord e a nord-est tenen limbazos chi s'assimizan intr' 'e issos: su bitichesu, su luvulesu, s' onaniesu e sos limbazos baroniesos. A oriente b'at su durgalesu chi tenet cosas chi s'assimizan a su baroniesu, a su nugoresu e a su barbaritzinu. Carchi linguista cussiderat custos limbazos comente chi sian un'ùnica macrovariante, chi mutin "nugoresu".
Carchi regula de fonosintassi
- S <> B = R <> B ; es. sos benes (pron. sor benes)
- S <> D = R <> D ; es. sos durches (pron. sor durches)
- S <> F = R <> F ; es. sos frores (pron. sor frores)
- S <> G = R <> G ; es. sos gustos (pron. sor gustos)
- S <> V = R <> V ; es. sos ventos (pron. sor ventos)
- S <> R = R <> R ; es. sas rosas (pron. sar rosas)
- S <> N = R <> N ; es. sos nugoresos (pron. sor nugoresos)
- S <> L = L <> L ; es. sas lacrimas (pron. sal lacrimas)
- S <> C = inv. ; es. sos canes (pron. sos canes), narrer cosa (pron. narres cosa)
- S <> P = inv. ; es. sos panes (pron. sos panes)
- S <> T = inv. ; es. sas turtas (pron. sas turtas)