Sardu nugoresu
Articulu in nugoresu
Su nugoresu est su limbazu chi si faveddat in sa bidda de Nùgoro. Ischirriande su sardu in duas macrovariantes su nugoresu diat resurtare unu limbazu logudoresu, mancari b'at fenòmenos morfolòzicos e fonèticos chi l'accurtzian fintzas a su campidanesu, e in su lèssicu nugoresu b'at paràgulas meda chi bi sun in campidanesu puru. Mancari Nùgoro siat in Barbàgia, su nugoresu no est unu limbazu barbaritzinu, comente sun imbetzes sos limbazos de sas biddas chi sun a làcana a Sud: su mamujadinu, s' ulianesu e s' orgolesu. Sos limbazos chi s'assimizan de prus sun sos de sas biddas chi bi sun a Ponente: Oroteddi, Onieri, Orane e Sarule, sas differèntzias de pronùntzia chin custos limbazos sun pacas. In sas biddas chi bi sun a Nord-Ovest, Benetutti, Nule e gai sichinde si faveddat su costerinu, chi est a midade tra su nugoresu e su logudoresu. A nord b'at Orune chi tenet unu limbazu suo chind una pronùntzia diversa dae sas àtteras biddas chi tenet acurtzu, ma b'at cosas chi s'assimizan a su nugoresu, a su costerinu e a su bittichesu. Sas àtteras biddas chi bi sun a nord e a nord-est tenen limbazos chi s'assimizan intr' 'e issos: su bittichesu, su luvulesu, s' onaniesu e sos limbazos baroniesos. A oriente b'at su durgalesu chi tenet cosas chi s'assimizan a su baroniesu, a su nugoresu e a su barbaritzinu. Dae carchi linguista custos limbazos sun cussideraos comente chi sian un'ùnica macrovariante chi muttin "nugoresu".