Sardu nugoresu

Su nugoresu est su limbazu chi si faveddat in sa bidda de Nùgoro. Ischirriande su sardu in duas macrovariantes su nugoresu diat resultare unu limbazu logudoresu, mancari b'at fenòmenos morfologicos e foneticos chi l'acurtzian fintzas a su campidanesu, e in su lessicu nugoresu b'at paragulas meda chi bi sun in campidanesu puru. Mancari nugoro siat in Barbagia su nugoresu no est unu limbazu barbaricinu, comente sun imbetzes sos limbazos de sas biddas chi sun a làcana a Sud: su mamujadinu, s'ulianesu e s'orgolesu. Sos limbazos chi s'assimizan de prus sun sos de sas biddas chi bi sun a Ponente: Oroteddi, Onieri, Orane e Sarule, sas diferèntzias de pronùntzia chin custos limbazos sun pacas. In sas biddas chi bi sun a Nord-Ovest, Benetutti, Nule, etc si faveddat su costerinu, chi est a midade tra su nugoresu e su logudoresu. A nord b'at orune chi tenet unu limbazu suo chind una pronuntzia chi est diversa dae sas ateras biddas chi tenet acurtzu, ma b'at cosas chi s'assimizan a su nugoresu, a su costerinu e a su bittichesu. Sas ateras biddas chi bi sun a nord e a nord-est tenen limbazos chi s'assimizzan intre issos: su bittichesu, su luvulesu, s'onaniesu e sos limbazos baroniesos. A oriente b'at su durgalesu chi tenet cosas chi s'assimizat a su baroniesu, a su nugoresu e a su barbaricinu. Dae carchi linguista custos limbazos sun cussideraos comente chi sian un' unica macrovariante.