HTML

In informatica l'HyperText Markup Language (HTML; traduçion leterale: lengoaggio a marcatoî pe ipertesti) o l'é un lengoaggio de markup. Nasciuo pe-a formataçion e inpaginaçion de documenti ipertestoali disponibili into web 1.0, ancheu o l'é prinçipalmente adeuviou pe-o dizacobiamento da strutua lògica de 'na pagina web (definia aponto da-o markup) e-a seu rapresentaçion, gestia co-i stili CSS pe adatase a-e neuve esigense de comunicaçion e pubricaçion in sce Internet.

L'HTML o l'é 'n lengoaggio de pubrico dominio, a quæ scintasci a l'é stabilia da-o World Wide Web Consortium (W3C). HTML o l'é derivou da-o SGML, un meta-lengoaggio ch'o serve pe-a definiçion de lengoaggi pe produe documenti destinæ a-a trasmiscion in formou eletrònico. A verscion atoale, a quinta, a l'é stæta rilasciâ da-o W3C into òtobre 2014.

A caxon prinçipâ che à portou o W3C e i seu menbri a svilupâ HTML5 a l'ea a necesitæ de fornî diretamente e fonçionalitæ che ean primma disponibili con de-e estenscioin pròpietaie feua da-i browser, comme Adobe Flash e scimili. Un segondo òbietivo che gh'aivan i svilupatoî o l'ea de garantî 'na magiô conpatibilitæ tra i diversci browser, indipendentemente da piataforma software adeuviâ, e in mòddo da anâ derê a l'espanscion do mercou di dispoxitivi mòbili.