HTML
 |
Esta article debe es revisada. | |
|---|
HTML es la lingua de marca dominante per construi pajes de rede. El es composada de elementos scriveda en la forma de "eticetas" ensircada par <brasetas angula> en la testo de la paje.
Esta elementos indica la semantica strutural de un testo, mostrante la loca de titulos, paragrafes, listas, sitas, lias, e cosas simil. Con eticetas on pote inclui imajes en pajes, e crea formularios.
Un documento HTML pote conteni programas en linguas como JavaScript cual ajunta cualias interatante a la paje. El pote conteni ance declaras de stilo, espresada en la lingua CSS, per defini la aspeta de la partes varios de la testo.
Istoria
La nom "HTML" es un corti de la espresa engles "HyperText Markup Language" (Lingua de Eticetas per Ipertesto).
HTML ia es creada par fisiciste Tim Berners-Lee en 1990, ci ia labora a CERN en Geneve. El ia proposa ja en 1980 un sistem de ipertesto par cual la rexercores de CERN ta pote esplora e comparti se documentos. El ia regarda HTML como un aplica de SGML, un sistem jeneral per struturi documentos.
De pos 1996, la spesifas tecnical de HTML es mantenida par un organiza nomida World Wide Web Consortium o "W3C", con contribuis ance de vendores comersial de programas. HTML ia deveni un norma internasional en 2000. En 2008, W3C ia publici la testo ru de la spesifa de la varia 5 de HTML, cual ajunta alga elementos nova per cosas comun en la rede moderna – como videos, menus de naviga, e pedes de paje.
HTML esiste ance en un varia nomida XHTML, un aplica de la tecnolojia XML. XHTML ave regulas plu sever ce HTML, donce el es plu difisil per scrive coreta par mano. Ma multe utiles esiste per manipula e muta fixes XML, donce XHTML es poplal entre tecnicistes.
Esemplo
Ave asi un esemplo simple de HTML 5:
<!doctype html>
<html>
<head>
<title>Esemplo de HTML 5</title>
</head>
<body>
<p>Alo, la mundo!</p>
</body>
</html>