ទីភ្នាក់ងារសហប្រតិបត្តិការអន្តរជាតិជប៉ុន

The printable version is no longer supported and may have rendering errors. Please update your browser bookmarks and please use the default browser print function instead.

ទីភ្នាក់ងារសហប្រតិបត្តិការអន្តជាតិជប៉ុន (独立行政法人国際協力機構 dokuritsu gyōseihōjin kokusai kyōryoku kikō ត្រូវបានគេស្គាល់ជាទូទៅដោយអក្សរកាត់ថា "JICA: Japan International Cooperation Agency ") គឺជាទីភ្នាក់ងាររដ្ឋាភិបាលឯករាជ្យមួយដែលសម្របសម្រួលជំនួយអភិវឌ្ឍន៍ផ្លូរការ (ODA) សម្រាប់រដ្ឋាភិបាលនៃប្រទេសជប៉ុន។ អង្គការនេះត្រូវបានបង្កើតឡើងដើម្បីជួយដល់កំណើនសេដ្ឋកិច្ច និងសង្គមនៅក្នុងប្រទេសកំពុងអភិវឌ្ឍ និងលើកកម្ពស់កិច្ចសហប្រតិបត្តិការអន្តរជាតិ។ ចាប់ពីថ្ងៃទី១ ខែមេសា ឆ្នាំ២០១២ មក ភ្នាក់ងារនេះត្រូវបានដឹកនាំដោយ សាស្ត្រាចារ្យ Tanaka Akihiko ដែលជានាកយរងនៃសាកលវិទ្យាល័យតូក្យូ។

ប្រវត្តិ

អង្គការ JICA ត្រូវបានបង្កើតឡើងដោយច្បាប់ស្តីពីស្ថាប័នរដ្ឋបាលឯករាជ្យJICA (ច្បាប់លេខ១៣៦ ចុះថ្ងៃទី៦ ធ្នូ ឆ្នាំ២០០២)។ អង្គការនេះត្រូវបានគេបង្កើតឡើងនៅថ្ងៃទី១ ខែតុលា ឆ្នាំ ២០០៣ ដូចមានចែងនៅក្នុងច្បាប់សហប្រតិបត្ដិការ (រដ្ឋាភិបាលឯករាជ្យ) ទីភ្នាក់ងារអន្តរជាតិនៃឆ្នាំ២០០២។ មុននេះ (ជប៉ុន) ទីភ្នាក់ងារសហប្រតិបត្តិការអន្តរជាតិ (ត្រូវបានគេស្គាល់ផងដែរថាជា " JICA") របស់ខ្លួនគឺជាអង្គការ ពាក់កណ្តាលរដ្ឋាភិបាលក្រោមដែនសមត្ថកិច្ចនៃក្រសួងការបរទេសដែលបានបង្កើតឡើងនៅក្នុងឆ្នាំ ១៩៧៤។ សមាសភាគដ៏សំខាន់មួយ នៃការរុះរើរចនាសម្ព័ន្ធដ៏ទូលំទូលាយនៃជំនួយអភិវឌ្ឍន៍ផ្លូវការរបស់ជប៉ុន ដែលរដ្ឋាភិបាលជប៉ុនបានសម្រេចចិត្តនៅក្នុងខែវិច្ឆិកា ឆ្នាំ ២០០៦ គឺជាការរួមបញ្ចូលគ្នាក្នុងឆ្នាំ២០០៨ រវាង JICA ហើយនិងផ្នែកមួយនៃធនាគារជប៉ុនសម្រាប់កិច្ចសហប្រតិបត្តិការអន្តរជាតិ ដែលបច្ចុប្បន្ននេះកំពុងពង្រីកកម្ចីសម្បទានទៅឱ្យ បណ្ដាប្រទេសកំពុងអភិវឌ្ឍ។ចាប់តាំងពីការរៀបចំរួចរាល់របស់ខ្លួននៅថ្ងៃទី ១ ខែតុលាឆ្នាំ២០០៨ "JICA ថ្មី" បានក្លាយជាអង្គការអភិវឌ្ឍទ្វេភាគីដ៏ធំមួយក្នុងចំណោមអង្គការអភិវឌ្ឍន៍ទ្វេភាគីធំជាងគេបំផុតនៅលើពិភពលោក ដែលមានបណ្តាញការិយាល័យ ៩៧ នៅក្រៅប្រទេស, គម្រោងជាង ១៥០ ប្រទេស និងធនធានហិរញ្ញវត្ថុប្រមាណ 1000 ពាន់លានយ៉េន ($ 8.5 មួយ ពាន់លានដុល្លារ)។ ទីភ្នាក់ងារដែលរៀបចំឡើងវិញក៏មានការទទួលខុសត្រូវចំពោះការគ្រប់គ្រងផ្នែកមួយនៃជំនួយឥតសំណងរបស់ប្រទេសជប៉ុន ដែលបច្ចុប្បន្នស្ថិតនៅក្រោមដែនសមត្ថកិច្ចរបស់ក្រសួងការបរទេសនិងសមាសធាតុ ODAសំខាន់ទាំង៣រួមមានកិច្ចសហប្រតិបត្តិការផ្នែកបច្ចេកទេស, ប្រាក់ជំនួយនិងប្រាក់កម្ចីសម្បទានត្រូវបានគ្រប់គ្រងនៅក្រោមដំបូលតែមួយ។ អង្គការ JICA ថ្មីក៏នឹងពង្រឹងការស្រាវជ្រាវនិងការហ្វឹកហ្វឺនក្នុងពេលប៉ុន្មានឆ្នាំខាងមុខ ដែលដើរតួជា think tank របស់ ODA និងរួមចំណែកដល់យុទ្ធសាស្រ្តអភិវឌ្ឍន៍ជាសកល, ពង្រឹងការសហការជាមួយស្ថាប័នអន្តរជាតិនិងអាចទាក់ទងជំហររបស់ប្រទេសជប៉ុនលើបញ្ហាការអភិវឌ្ឍនិងជំនួយឲ្យកាន់តែប្រសើរឡើង។

ការផ្លាស់ប្តូរខាងមុខនេះនឹងជាផ្នែកបន្ថែមនៃកំណែទម្រង់អង្គការ JICA ដែលបានចាប់ផ្តើមនៅខែតុលា ឆ្នាំ២០០៣ នៅពេលដែលបានក្លាយជារដ្ឋបាលឯករាជ្យ។ សហគ្រាសក្នុងស្រុករបស់អង្គការនេះរួមមានមជ្ឈមណ្ឌលអន្តរជាតិជាកន្លែងដែល JICA បានជួយបណ្តុះបណ្តាលមន្ត្រីសាធារណៈបរទេសចំនួន ៨០០០នាក់ អ្នកស្រាវជ្រាវ វិស្វករ គ្រូបង្រៀន និងមេដឹកនាំសហគមន៍ជារៀងរាល់ឆ្នាំនៅប្រទេសជប៉ុនដែលកំពុងត្រូវបានធ្វើឲ្យប្រសើរឡើង។ អង្គការនេះក៏បានទទួលនិងកំពុងការផ្លាស់ប្តូរផ្នែកប្រតិបត្តិការ និងផ្នែករចនាសម្ព័ន្ធក្នុងការិយាល័យតាមបណ្ដាប្រទេសរបស់ខ្លួន។ ការសង្កត់ធ្ងន់យ៉ាងខ្លាំងត្រូវបានដាក់ទៅលើវិធីសាស្ត្របែប field base ដើម្បីឆ្ពោះទៅកាន់កម្មវិធី គម្រោង វិសហមជ្ឈការបុគ្គលិកព្រមទាំងកំណើននៃការផ្ទេរសិទ្ធិពីការិយាល័យកណ្ដាលនៅទីក្រុងតូក្យូទៅកាន់ការិយាល័យបរទេស និងកាត់បន្ថយការិយាធិបតេយ្យព្រមទាំងកម្មវិធីឬគម្រោងតាមដានរហ័ស។

កំណើននៃគម្រោងឬកម្មវិធីរបស់ JICAផ្តោតទៅលើអ្វីដែលនាយកអង្គការ JICA គឺលោកស្រី សាដាកូ អូហ្កាតា ( Sadako Otaga ) បានពណ៌នាប្រៀបបានជាការផ្ដល់នូវ "សន្តិសុខរបស់មនុស្ស"។ ទស្សនៈដែលទើបតែអភិវឌ្ឍន៍ថ្មីនៃ "សន្តិសុខរបស់មនុស្ស" នឹងផ្ដល់អំណាចទៅដល់សហគមន៍ក្នុងស្រុកដើម្បីឲ្យមានការបញ្ចេញយោបល់របស់គេនាពេលអនាគតដោយកម្មវិធីពង្រឹងមូលដ្ឋានដូចជាការធ្វើឲ្យប្រសើរឡើងនូវគម្រោង ការអប់រំ និងសុខភាព។

សកម្មភាព

អង្គការ JICA ជាផ្នែកមួយនៃកិច្ចខិតខំប្រឹងប្រែងផ្ដល់ជំនួយអភិវឌ្ឈន៍ជាផ្លូវការរបស់ជប៉ុន ដែលមានតួនាទីក្នុងការផ្ដល់កិច្ចសហប្រតិបត្តិការបច្ចេកទេស និងការផ្ដល់ដើមទុននិងប្រាក់កម្ចីជាប្រាក់យ៉េន។ កម្មវិធីអភិវឌ្ឍន៍ស្នូលរបស់អង្គការ JICA ជាកម្មវិធីឬគម្រោងជំនួយបច្ចេកវិទ្យាសម្រាប់ការអភិវឌ្ឍសម្ថភាព និងស្ថាប័ន, ការសិក្សាលទ្ធភាពអនុវត្ត និងផែនការមេ។ អ្នកស្ម័គ្រចិត្តសហប្រតិបត្តិការជប៉ុននៅក្រៅប្រទេស (អង់គ្លស: Japan Overseas Cooperation Volunteers ហៅកាត់ថា JOCV), អ្នកស្ម័គ្រចិត្តចាស់របស់អង្គការ JICA ព្រមទាំងក្រុមជួយសង្គ្រោះនៅពេលមានគ្រោះមហន្តរាយរបស់អង្គការ JICA ត្រូវបានគេស្គាល់យ៉ាងទូលំទូលាយក្នុងចំណោមសាធារណៈជន និងអ្នកជាប់ពន្ធជប៉ុន។ នៅពេលមានគ្រោះមហន្តរាយកើតឡើង គេតែងឃើញក្រុមជួយសង្គ្រោះនៅក្នុងរបាយការណ៍ព័ត៌មានអំពីកិច្ចខិតខំប្រឹងប្រែងជួយសង្គ្រោះនៅក្នុងព្រឹត្តិការណ៍គ្រោះមហន្តរាយធំៗជុំវិញពិភពលោក ដូចជា ការរញ្ជួយដីនៅទ្វីបអាស៊ីខាងត្បូងកាលពីឆ្នាំ២០០៥។

សេចក្តីថ្លែងការណ៍បេសកកម្មរបស់អង្គការ JICA

"យើងគឺស្ពានរវាងប្រជាជននៃប្រទេសជប៉ុន និងបណ្តាប្រទេសកំពុងអភិវឌ្ឍមួយ ដែលនឹងជម្រុញកិច្ចសហប្រតិបត្តិការអន្តរជាតិតាមរយៈការចែករំលែកចំណេះដឹង និងបទពិសោធ ព្រមទាំងធ្វើការដើម្បីកសាងពិភពលោកឲ្យមានសន្តិភាពនិងវិបុលសុខជាងមុន។"

បែបបទនៃការផ្ដល់ជំនួយដ៏សំខាន់

កម្មវិធី / គម្រោងជំនួយបច្ចេកទេសសម្រាប់សមត្ថភាព និងការអភិវឌ្ឍស្ថាប័ន
ការសិក្សាលទ្ធភាពអនុវត្ត និងផែនការមេ
បញ្ចូនអ្នកជំនាញ

អ្នកជំនាញបានបញ្ជូនទៅតាមតំបន់ រួមមានអ្នកដែលត្រូវបានគេផ្ដល់អនុសាសន៍ពីក្រសួងរដ្ឋាភិបាលពាក់ព័ន្ធ និងទីភ្នាក់ងារ ព្រមទាំងអ្នកដែលដាក់ពាក្យតាមរយៈប្រព័ន្ធចុះឈ្មោះអ្នកឯកទេស។ ការងារទាំងនេះគិតចាប់ពីការស្នាក់នៅរយៈពេលលើសពីមួយឆ្នាំចុះមកដល់ការស្នាក់នៅរយៈពេលតិចជាងមួយឆ្នាំ។

កម្មវិធីបណ្តុះបណ្ដាលបច្ចេកទេស

JICA បានផ្តល់នូវការបណ្តុះបណ្តាលបច្ចេកទេសសម្រាប់អ្នកចូលរួមពីបណ្តាប្រទេសកំពុងអភិវឌ្ឍនៅក្នុងជួរវិស័យដ៏ធំទូលាយមួយ ដែលរួមបញ្ចូលទាំងការបណ្តុះបណ្តាលផ្នែកវេជ្ជសាស្ត្រ ឧស្សាហកម្ម និងកសិកម្ម។

ការហ្វឹកហ្វឺនបណ្ដុះបណ្ដាលក្នុងប្រទេសជប៉ុន
- ការហ្វឹកហ្វឺនជាក្រុម
  - វគ្គសិក្សាវិស័យជាក់លាក់ (វគ្គសិក្សាក្នុងគោលបំណងធ្វើឲ្យការយល់ដឹងពីបញ្ហានៅទូទាំងពិភពលោកក្នុងវិស័យនានាកាន់តែមានភាពច្បាស់លាស់។ វគ្គសិក្សាជាទូទៅមានមនុស្សពី ៤ ទៅ ១៤នាក់ និងជាមធ្យម១០នាក់។ វគ្គសិក្សាមានរយៈពេលខុសៗគ្នា ពោលគឺមានពីរយៈពេលពី ៣សប្ដាហ៍ទៅ ១ឆ្នាំ។)
  - វគ្គសិក្សាតាមតំបន់ ឬប្រទេសជាក់លាក់ (វគ្គសិក្សាក្នុងគោលបំណងធ្វើឲ្យការយល់ដឹងពីបញ្ហានៅតាមតំបន់ឬប្រទេសជាក់លាក់មួយ។)
- ការហ្វឹកហ្វឺនតាមបុគ្គលម្នាក់ៗ (ជាទូទៅជាការហ្វឹកហ្វឺនបច្ចេកទេសជាក់លាក់សម្រាប់គម្រោងណាមួយ។)
- ការស្នាក់នៅ

អង្គការ JICAមានកន្លែងស្នាក់នៅផ្ទាល់ខ្លួនសម្រាប់អ្នកចូលរួម។ កន្លែងទាំងនោះមានទីតាំងស្ថិតនៅក្នុងទីក្រុងដ៏សំខាន់នៅក្នុងប្រទេសជប៉ុន និងជាទូទៅត្រូវបានគេស្គាល់ថាជាមជ្ឈមណ្ឌលអន្តរជាតិ។ កន្លែងមួយដែលនៅក្រុងតូក្យូ គឺជាមជ្ឈមណ្ឌលអន្តរជាតិតូក្យូដែលស្ថិតនៅ Hatagaya, Shibuya។ កន្លែងនេះមានគុណភាពល្អ ហើយព័ត៌មានលម្អិតអាចរកបាននៅក្នុងគេហទំព័រ JICA ។

ការបែងចែកអ្នកស្ម័គ្រចិត្ត

អ្នកស្ម័គ្រចិត្ត(យុវជន)សហប្រតិបត្តិការក្រៅប្រទេស ជប៉ុន
អ្នកស្ម័គ្រចិត្តក្រៅប្រទេសចាស់
យុវជនស្ម័គ្រចិត្តសង្គម Nikkei
អ្នកស្ម័គ្រចិត្តសង្គមចាស់ Nikkei

ខ្សែពេលវេលា

ខែមេសា ១៩៥៤ – ប្រទេសជប៉ុនបានចូលរួមជាមួយផែនការកូឡំបូ និងចាប់ផ្ដើមកម្មវិធីកិច្ចសហប្រតិបត្តិការបច្ចេកទេស
ខែមិថុនា ១៩៦២ - ទីភ្នាក់ងារ សហប្រតិបត្តិការ បច្ចេកវិទ្យា ក្រៅ ប្រទេស (អង់គ្លស: Overseas Technology Cooperation Agency ហៅកាត់ថាOTCA) បានបង្កើតឡើង
កក្កដា ១៩៦៣ - សេវាកម្ម អន្តោប្រវេសជប៉ុន (អង់គ្លេស :Japan Emigration Service កាត់ថា JEMIS) បានបង្កើតឡើង
ខែមេសា ១៩៦៥ - កម្មវិធីអ្នកស្ម័គ្រសហប្រតិបត្តិការ ក្រៅប្រទេស ជប៉ុន(អង់គ្លេស Japan Overseas Cooperation Volunteers ហៅកាត់ថាJOCV)បានចាប់ផ្ដើម
ខែសីហា ១៦៧៤ - OTCA និងJEMIS បញ្ចូលចូលគ្នាដើម្បីបង្កើតជាទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA)
ខែកញ្ញា ១៩៨៧ - ក្រុមសង្គ្រោះនៅពេលមានមហន្តរាយបានបង្កើតឡើង
ខែ១៩៨៩- រាល់ការរួមចំណែក របស់ ជំនួយអភិវឌ្ឍន៍ជាផ្លូវការ (អង់គ្លេស : official development assistance ហៅកាត់ថាODA) លើសពីការរួមចំណែករបស់សហរដ្ឋអាមេរិកហើយក្លាយជាការរូមចំណែកដ៏ធំបំផុតលើពិភពលោក
ខែមេសា ១៩៩០ - កម្មវិធីបែងចែក អ្នកជំនាញសហប្រតិបត្តិការជាន់ខ្ពស់ (អ្នកស្ម័គ្រចិត្តចាស់ក្រៅប្រទេស) បានចាប់ផ្ដើម
ខែតុលា ២០០៣ - អង្គការ JICA បានក្លាយជាទីភ្នាក់ងាររដ្ឋាភិបាលឯករាជ្យ

តំណភ្ជាប់ខាងក្រៅ