ច្បាប់ស្តីពីការបោះផ្សាយនិងការជួញដូរមូលបត្រមហាជន
ច្បាប់ ស្តីពីការបោះផ្សាយ និងការជួញដូរមូលបត្រមហាជន ត្រូវបានរដ្ឋសភាអនុម័តកាលពីថ្ងៃទី ១២ ខែកញ្ញា ឆ្នាំ២០០៧ នាសម័យប្រជុំវិសាមញ្ញរបស់រដ្ឋសភានីតិកាលទី៣ ដែលមានសេចក្តីទាំងស្រុងដូចតទៅ៖
ជំពូកទី១ បទប្បញ្ញត្តិទូទៅ
ជំពូកទី២ គណៈកម្មការមូលបត្រកម្ពុជា
ជំពូកទី៣ សំណើលក់មូលបត្រ និង ការបោះផ្សាយមូលបត្រ
ជំពូកទី៤ ដំណើរការរបស់ទីផ្សារមូលបត្រ
ជំពូកទី៥ អជ្ញាប័ណ្ណរបស់ក្រុមហ៊ុនមូលបត្រ និងភ្នាក់ងាររបស់ក្រុមហ៊ុនមូលបត្រ
ជំពូកទី៦ អភិបាលកិច្ច និងការគ្រប់គ្រងក្រុមហ៊ុនបោះផ្សាយលក់មូលបត្រ
ជំពូកទី៧ អាកប្បកិរិយាដែលត្រូវបានហាមឃាត់ទាក់ទិនទៅនឹងមូលបត្រ
ជំពូកទី៨ ការដោះស្រាយវិវាទ និង វិធានការទណ្ឌកម្ម
ជំពូកទី៩ ទោសប្បញ្ញត្តិ
ជំពូកទី១០ អវសានប្បញ្ញត្តិ
ឧបសម្ព័ន្ឋនៃច្បាប់ស្តីពីការបោះផ្សាយ និងការជួញដូរមូលបត្រមហាជន សទ្ទានុក្រមសម្រាប់ប្រើប្រាស់ក្នុងច្បាប់នេះ
- ការកាន់កាប់ភាគហ៊ុនចំនួនច្រើន(Substantial Share Holding) សំដៅដល់ការការកាន់កាប់ភាគហ៊ុនមានសិទ្ធិបោះឆ្នោតរបស់បុគ្គលម្នាក់ ឬភាគីពាក់ព័ន្ឋ ឬ សមាការីរបស់បុគ្គលនោះដែលមានចំនួនចាប់ពី ៥(ប្រាំ) ភាគរយឡើងទៅ នៅក្នុងក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលប្រតិស្រុត។
- កិច្ចសន្យាធានាទិញ(Underwriting Agreement) សំដៅដល់កិច្ចព្រមព្រៀងដែលធ្វើឡើងដើម្បីធានាទិញមូលបត្រទាំងអស់ ឬ មួយផ្នែកដែលលក់មិនអស់ តាមនីតិវិធីនៅកាលបរិច្ឆេទផុតកំណត់នៃសំណើលក់ជាសាធារណៈ។ កិច្ចសន្យាធានាទិញនោះ គឺរាប់បញ្ចូលទាំងកិច្ចសន្យាធានាទិញបន្តដែលធ្វើឡើងដោយបុគ្គលដែលមានការអនុញ្ញាតតាមច្បាប់នេះ។
ផុតរយៈពេលនោះឯកជនត្រូវផ្ទេរនូវសិទ្ធិ សិទ្ធិកាន់កាប់ និង ផលប្រយោជន៍ទាំងអស់លើសំណង់ហេដ្ឋារចនាសម្ព័ន្ធ ដែលមានលក្ខណៈល្អ តាមលក្ខខណ្ឌនៃកិច្ចសន្យាមកឲ្យ ស្ថាប័នមានសមត្ថកិច្ចវិញ។
- ក្រុមហ៊ុនមូលបត្រ(Securities Firm) សំដៅដល់ក្រុមហ៊ុន ឬ ក្រុមហ៊ុនសហកម្មសិទិ្ធដែលទទួលបានអជ្ញាប័ណ្ណដើម្បីធ្វើអាជីវកម្មមូលបត្រដោយស្របទៅតាមច្បាប់នេះ។
- ក្រុមហ៊ុនមហាជនទទួលខុសត្រូវមានកម្រិត(Public Limited Company) សំដៅដល់ក្រុមហ៊ុនដែលបង្កើតឡើង និង ចុះបញ្ជីតាមច្បាប់ស្តីពីសហគ្រាសពាណិជ្ជកម្មក្នុងគោលបំណងបោះផ្សាយលក់មូលបត្រជាសាធារណៈ។
- ក្រុមហ៊ុនសហកម្មសិទ្ឋិ(Partnership) សំដៅដល់សមាគមជំនួញ ដែលធ្វើអាជីវកម្មទទួលខុសត្រូវទូទៅ ឬ ទទួលខុសត្រូវមានកម្រិត ដែលបានបង្កើតឡើងដោយរូបវន្តបុគ្គលរួមគ្នា និង ចុះបញ្ជីតាមស្តីពីសហគ្រាសពាណិជ្ជកម្ម។
- ក្រុមហ៊ុន(Company) សំដៅដល់ក្រុមហ៊ុនឯកជន ឬ ក្រុមហ៊ុនមហាជនទទួលខុសត្រូវមានកម្រិតដែលបានបង្កើត ឬ ចុះបញ្ជីតាមស្តីពីសហគ្រាសពាណិជ្ជកម្ម។
- គណៈកម្មការមូលបត្រកម្ពុជា(Securities and Exchange Commission of Cambodia) សំដៅដល់នីតិបុគ្គលដែលបង្កើតឡើងដោយច្បាប់នេះ ដើម្បីគ្រប់គ្រងនិងត្រួតពិនិត្យប្រតិបត្តិការមូលបត្រ។
- តុលាការ(Court) សំដៅដល់តុលាការមានសមត្ថកិច្ចដែលត្រូវបានបង្កើតឡើងនៅក្នុងព្រះរាជាណាចក្រកម្ពុជាដើម្បីបើកសវនាការ និង សម្រេចសេចក្តីដែលបណ្តឹងតាមច្បាប់នេះ។
- ភ្នាក់ងារក្រុមហ៊ុនមូលបត្រ(Securities Representative) សំដៅដល់បុគ្គលដែលបំពេញនូវមុខងារ ឬ សកម្មភាពតាមការឯកភាពរបស់ក្រុមហ៊ុនមូលបត្រដែលតម្រូវឲ្យមាន និង ត្រូវមានអជ្ញាប័ណ្ណដោយអនុលោមតាមច្បាប់នេះ។ ភ្នាក់ងារក្រុមហ៊ុនមូលបត្រត្រូវរាប់បញ្ចូលទាំងអគ្គនាយក នាយក បុគ្គលិក ឬ នយោជិករបស់ក្រុមហ៊ុន ឬ សហកម្មសិទ្ធិករដែលបំពេញមុខងារទាំងនេះក្នុងនាមក្រុមហ៊ុនមូលបត្រ។
- ទីផ្សារមូលបត្រ(Securities Market) សំដៅដល់ទីផ្សារ ឬ ទីកន្លែងជួញដូរមូលបត្រ ឬ ប្រព័ន្ធដែលផ្តល់មធ្យោបាយនៃការធ្វើសំណើលក់ ផ្ទេរ ឬ ស្វីការទិញ-លក់មូលបត្រ។
- ទម្រង់អរូបីនៃមូលបត្រ(Dematerialized Form) សំដៅដល់ទម្រង់កត់ត្រាកម្មសិទ្ធិស្របច្បាប់នៃមូលបត្រដែលធ្វើឡើងតាមប្រព័ន្ធអេឡិចត្រូនិច ឌីជីថល ឬ កុំព្យូទ័រ ដែលអាចបើកមើលបាន និង បោះពុម្ពជាទម្រង់ដែលអាចអានបាន។
- ទិញ សំដៅដល់ការទិញតាមគ្រប់រូបភាព ដូចជាទិញដោយផ្ទាល់ ឬ ទិញតាមប្រព័ន្ធអេឡិចត្រូនិច ឬ ចុះឈ្មោះសុំទិញ(ធ្វើបរិវិសកម្ម)។
- នីតិបុគ្គលប្រតិស្រុត(Permitted Entity) សំដៅដល់នីតិបុគ្គលដែលត្រូវបានអនុញ្ញាតឲ្យបោះផ្សាយ និងធ្វើសំណើលក់មូលបត្រជាសាធារណៈក្នុងព្រះរាជាណាចក្រកម្ពុជាស្របតាមច្បាប់នេះ និង បទប្បញ្ញត្តិផ្សេងៗ។ នីតិបុគ្គលនេះមិនមែនជាក្រុមហ៊ុនមហាជនទទួលខុសត្រូវមានកម្រិតដែលត្រូវបានបង្កើតឡើងនៅព្រះជាណាចក្រកម្ពុជា។
- បុគ្គល(Person) សំដៅដល់រូបវន្តបុគ្គល ឬ នីតិបុគ្គលរួមទាំងក្រុមហ៊ុន និង ក្រុមហ៊ុន។
- បុគ្គលពាក់ព័ន្ឋ(Related Entity) ទាក់ទិននឹងក្រុមហ៊ុនដែលធ្វើសំណើលក់មូលបត្រជាសាធារណៈ សំដៅដល់បុគ្គលណាមួយដូចខាងក្រោម៖
- ភាគទុនិកដែលជាស្ថាបនិកក្រុមហ៊ុន។
- សាច់ញាតិផ្ទាល់របស់ភាគទុនិកជាស្ថាបនិកក្រុមហ៊ុន។
- នាយកក្រុមហ៊ុន ឬ សាខាក្រុមហ៊ុន ឬ ក្រុមហ៊ុនហូលឌីង។
- សាច់ញាតិផ្ទាល់របស់នាយកក្រុមហ៊ុនទាំងនោះ។
- សាខាក្រុមហ៊ុន ឬ ក្រុមហ៊ុនហូលឌីង ឬ សាខាក្រុមហ៊ុនហូលឌីង។
- រូបវន្តបុគ្គល ឬ នីតិបុគ្គលផ្សេងទៀតដែលត្រូវបានចែងក្នុងបទប្បញ្ញត្តិ ឬ អនុក្រឹត្យ។
- ប្រតិបត្តិកររក្សាទុកមូលបត្រ(Securities Depository) សំដៅដល់បុគ្គលមូយយល់ព្រមជាមួយបុគ្គលមួយផ្សេងទៀត ដែលជាអតិថិជនរបស់ខ្លួនថាផ្តល់សេវាកម្មដូចខាងក្រោមនេះ ទោះបីជាអតិថិជននោះធ្វើសកម្មភាពក្នុងនាមខ្លួនឯង ឬ ធ្វើសកម្មភាពក្នុងនាមបុគ្គលផ្សេងទៀតក៏ដោយ៖
- កាន់កាប់ ឬ ចុះបញ្ជីសិទិ្ធស្របច្បាប់លើមូលបត្រ ឬ ឧបករណ៍ហិរញ្ញវត្ថុដទៃទៀត ក្នុងនាមអតិថិជន ឬ បុគ្គលផ្សេងទៀតដែលអតិថិជនតែងតាំង។
- ទទូលរក្សាទុកនូវមូលបត្រ ឬ ឧបករណ៍ហិរញ្ញវត្ថុដទៃទៀត ទោះបីមានរូបភាពជាវិញ្ញាបនបត្រកម្មសិទ្ធិ ឬ ជាទម្រង់អរូបីក្តីដោយស្របទៅតាមវិធានប្រតិបត្តិការរក្សាទុកមូលបត្រក្នុងនាមអតិថិជន ឬ បុគ្គលផ្សេងទៀតដែលអតិថិជនតែងតាំង។
- ផ្តល់សេវាកម្មនិងលក្ខណៈងាយស្រួលផ្សេងៗទៀតដែលទាក់ទិននឹងការផ្តល់សេវាកម្មដូចមានចែងក្នុងកថាខណ្ឌ(ក) និង (ខ)។
- ប្រតិបត្តិការមូលបត្រអញ្ញត្រកម្ម(Exempt Securities Transaction) សំដៅដល់ប្រតិបត្តិការមូលបត្រដែលធ្វើដោយបុគ្គលជាក់លាក់ណាមួយ ឬ ដោយបុគ្គលផ្សេងទៀត ដើម្បីចុះឈ្មោះសុំទិញ ទិញ បោះផ្សាយ លក់ ឬ ផ្ទេរមូលបត្រ ដោយមិនចាំបាច់បំពេញតាមលក្ខខណ្ឌនៃច្បាប់នេះ។
- ប្រព័ន្ឋផាត់ទាត់ និងទូទាត់(Clearance and Settlement Facility) សំដៅដល់ប្រព័ន្ធដែលផ្តល់លទ្ធភាពដល់ភាគីធ្វើប្រតិបត្តិការជួញដូរមូលបត្របំពេញកាតព្វកិច្ចរបស់ខ្លួនទៅវិញទៅមកបានដោយធ្វើការផ្ទៀងផ្ទាត់ប្រតិបត្តិការឲ្យមានការទូទាត់ថ្លៃទិញជូនអ្នកលក់ ដែលជាថ្នូរនឹងការផ្ទេរកម្មសិទ្ធិមូលបត្រទៅឲ្យអ្នកទិញ។
- ផលប្រយោជន៍ក្នុងគម្រោងវិនិយោគរួម(Interest in a Managed Investment Scheme) សំដៅដល់ផលប្រយោជន៍ស្របច្បាប់ទោះបីដោយផ្ទាល់ ឬ ដោយប្រយោល នៅក្នុងគម្រោងវិនិយោគដែលមានលក្ខណៈដូចតទៅ៖
- បុគ្គលផ្តល់វិភាគទានសាច់ប្រាក់ ឬ ផ្តល់វត្ថុមានតម្លៃ ដើម្បីមានសិទ្ធិទទួលផលកម្រៃដែលបានមកពីគម្រោងវិនិយោគ។
- រាល់វិភាគទានដែលប្រមូលបានហើយត្រូវបានយកទៅប្រើប្រាស់នៅក្នុងគម្រោងវិនិយោគ ដើម្បីបង្កើតផលកម្រៃហិរញ្ញវត្ថុ ឬ ផលកម្រៃដែលបានមកជាសិទ្ធិ ឬ ជាផលប្រយោជន៍លើទ្រព្យសម្បត្តិ សម្រាប់សមាជិកដែលមានផលប្រយោជន៍ក្នុងគម្រោងវិនិយោគនោះ ទោះបីសមាជិកនោះមិនគ្រប់គ្រងលើប្រតិបត្តិការប្រចាំថ្ងៃនៃគម្រោងវិនិយោគនោះក៏ដោយ។
- ពាណិជ្ជករមូលបត្រ(Securities Dealer) សំដៅដល់ពាណិជ្ជករដែលធ្វើអាជីវកម្មមូលបត្រ។
- ពាណិជ្ជករមូលបត្រអញ្ញត្រកម្ម(Exempt Securities Dealer) សំដៅបុគ្គលដែលធ្វើអាជីវកម្មមូលបត្រ ដោយមិនចាំបាច់បំពេញតាមលក្ខខណ្ឌនៃច្បាប់នេះ។ ពាណិជ្ជករមូលបត្រអញ្ញត្រកម្មនេះនឹងមានចែងដោយអនុក្រឹត្យ ឬ ប្រកាស។
- ភាគហ៊ុនមានសិទ្ឋិបោះឆ្នោត(Voting Share) សំដៅដល់ភាគហ៊ុនរបស់ក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលប្រតិស្រុត ដែលផ្តល់សិទ្ធិបោះឆ្នោតទៅឲ្យអ្នកកាន់កាប់ភាគហ៊ុនដែលបានចុះបញ្ជី។
- មូលបត្រមហាជន(Non-government Securities) សំដៅដល់មូលបត្រដែលបោះផ្សាយដោយក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលផ្សេងទៀត ដែលត្រូវបានអនុញ្ញាតឲ្យបោះផ្សាយលក់មូលបត្រជាសាធារណៈ នៅក្នុងព្រះរាជាណាចក្រកម្ពុជាដោយអនុលោមតាមច្បាប់។ មូលបត្រទាំងនោះមាន៖
- មូលបត្រកម្មសិទ្ធិរាប់បញ្ចូលទាំងភាគហ៊ុន។
- មូលបត្របំណុល រាប់បញ្ចូលទាំងសញ្ញាប័ណ្ណ។
- ផលប្រយោជន៍ក្នុងគម្រោងវិនិយោគរួម។
- ឧបករណ៍និស្សន្ទ ឬ ឧបករណ៍ដេរីវេទីវ ដែលទាក់ទងនឹងមូលបត្រមួយគឺយោងទៅលើចំណុច(1) (2) ឬ(3)ខាងលើ។
- ឧបករណ៍ហិរញ្ញវត្ថុដទៃទៀតដែលកំណត់ថាជាមូលបត្រ។
- មូលបត្រកម្មសិទ្ឋិ(Equity Securities) សំដៅដល់ផលប្រយោជន៍ ឬ សិទ្ធិស្របច្បាប់លើមូលបត្រនៃក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលបរទេសប្រហាក់ប្រហែលហើយរាប់បញ្ចូលទាំងភាគហ៊ុនដែលមានសិទ្ធិបោះឆ្នោត និងគ្មានសិទ្ធិបោះឆ្នោតភាគហ៊ុនមិនបង់ថ្លៃគ្រប់ និងភាគហ៊ុនបុរិមា។
- មូលបត្រគាហក(Bearer Securities) សំដៅដល់មូលបត្រដែលមានកម្មសិទ្ធិនៃមូលបត្រនោះត្រូវបានកំណត់ដោយការកាន់កាប់ជារូបវន្ត មិនមែនតាមរយៈការចុះបញ្ជីនៃកម្មសិទ្ធិករនៅក្នុងបញ្ជីមូលបត្រ ដែលរក្សាទុកដោយ ឬ រក្សាទុកសំរាប់ក្រុមហ៊ុនបោះផ្សាយមូលបត្រ។
- មូលបត្រថ្មី(New Securities) សំដៅដល់មូលបត្រដែលមិនធ្លាប់បានបោះផ្សាយ ឬ ធ្វើសំណើលក់ជាសាធារណៈពីមុនមកដោយក្រុមហ៊ុនបោះផ្សាយមូលបត្រដែលមានចែងក្នុងច្បាប់។
- មូលបត្របំណុល(Debt Securities) សំដៅដល់ឧបករណ៍ហិរញ្ញវត្ថុដែលបោះផ្សាយដោយបុគ្គលណាមួយ ដោយបញ្ជាក់ ឬ ទទួលស្គាល់នូវបំណុលរបស់ខ្លួនចំពោះបុគ្គលមួយទៀតដែលបានឲ្យខ្ចីប្រាក់ខ្ចី ឬ ដាក់ជាប្រាក់បញ្ញើជាមួយបុគ្គលនោះ ឬ បុគ្គលនោះជំពាក់តាមវិធីផ្សេងពីនេះ ហើយទោះបីជាមាន ឬ គ្មានទ្រព្យដាក់ធានាក្តី។
- រដ្ឋមន្រ្តី សំដៅដល់រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ។
- វិធានប្រតិបត្តិការនៃទីផ្សារមូលបត្រ ឬនៃប្រព័ន្ឋផាត់ទាត់និងទូទាត់ ឬ នៃសេវារក្សាទុកមូលបត្រ(Operating Rules of a securities market, clearance and settlement facility, or Securities Depository) សំដៅដល់វិធាន និងនីតិវិធីដែលគ្រប់គ្រងសមាជិកភាព និងការចូលរួមក្នុងទីផ្សារ ឬ ប្រព័ន្ធផាត់ទាត់ និងទូទាត់ ឬសេវាកម្មទុកមូលបត្រ ដែលរួមទាំង៖
- លក្ខន្តិកៈរបស់ប្រតិបត្តិករទីផ្សារមូលបត្រ ឬ ប្រតិបត្តិករប្រព័ន្ធផាត់ទាត់ និងទូទាត់ ឬ ប្រតិបត្តិកររក្សាទុកមូលបត្រ។
- សហការី(Associate) សំដៅដល់បុគ្គលដែលកំពុងមានទំនាក់ទំនងអាជីវកម្មជាមួយបុគ្គលផ្សេងទៀត។
- សមាជិកគ្រួសារផ្ទាល់(Close relative) សំដៅទំនាក់ទំនងជា ប្តី ប្រពន្ធ កូន ឪពុក ម្តាយ បងប្អូនប្រុស ឬ បងប្អូនស្រីរបស់បុគ្គលណាម្នាក់។
- ស្វ័យនិយ័តករ(Self Regulatory Organization) សំដៅដល់ស្ថាប័នដែលគ្រប់គ្រងសមាជិករបស់ខ្លួនតាមរបៀបដែលសមាជិកនោះធ្វើអាជីវកម្ម។
- សំណងព្យសនកម្ម(Damage) សំដៅដល់ការទូទាត់សងការខូចខាត។
- សំណើលក់មូលបត្រជាសាធារណៈ(Public Offer) សំដៅដល់ការអញ្ជើញសាធារណជនឲ្យដាក់ពាក្យសុំទិញ ឬ ទិញមូលបត្រ។ សំណើលក់នេះរួមមាន៖
- សំណើដាក់លក់ ឬ ទិញមូលបត្រដែលធ្វើឡើងចំពោះមជ្ឈដ្ឋានសាធារណជនជាក់លាក់ណាមួយដែលត្រូវបានជ្រើសរើសឡើងតាមរបៀបណាក៏ដោយ។
- សំណើដាក់លក់ ឬទិញមូលបត្រដែលធ្វើឡើង តាមរបៀបចៃដន្យចំពោះសមាជិកនៃមជ្ឈដ្ឋានសាធារណៈដែលបានជ្រើសរើស។
- សំណើដាក់លក់ ឬ ទិញមូលបត្រដែលធ្វើឡើង ចំពោះបុគ្គលដែលស្គាល់ពីមុនតាមរយៈការផ្សាយពាណិជ្ជកម្មសំណើដាក់លក់ ឬ ទិញ ឬ តាមរយៈការអញ្ជើញបុគ្គលនោះឲ្យមកសាកសួរព័ត៌មាន ឬ សុំការពិគ្រោះយោបល់អំពីការធ្វើវិនិយោគលើមូលបត្រ
- ការចែកអត្ថបទផ្សាយពាណិជ្ជកម្មឯកសារផ្តល់ព័ត៌មាន ឬ ពាក្យស្នើសុំដែលទាក់ទងនឹងការដាក់ពាក្យសុំទិញ ការទិញ ឬ ការលក់មូលបត្រ។
ប៉ុន្តែសំណើលក់ជាសាធារណៈមិនរាប់បញ្ចូលនូវ៖
- សំណើលក់ជាឯកជនដែលធ្វើឡើងចំពោះបុគ្គលដែលមានទំនាក់ទំនងជាមួយនឺង បុគ្គលធ្វើសំណើលក់ ឬ សហការី។
- សំណើលក់ឯកជនដែលធ្វើឡើង ចំពោះបុគ្គលដែលមានចំនួនមិនលើសពី៣០(សាមសិប)រូប។
- ការអញ្ជើញបុគ្គលណាមួយឲ្យធ្វើកិច្ចព្រមព្រៀងធានាទិញ ឬ កិច្ចព្រមព្រៀងធានាបន្តដែលទាក់ទិននឹងការបោះផ្សាយមូលបត្រ។
- សំណើលក់មូលបត្រជាឯកជន(Private or Personal Offer) សំដៅដល់សំណើលក់ដែល៖
- ត្រូវបានធ្វើស្វីការដោយបុគ្គលដែលជាអ្នកទទួលសំណើ។
- ត្រូវបានធ្វើឡើងចំពោះបុគ្គល ដែលមានការចាប់អារម្មណ៍ចំពោះសំណើលក់ដោយពិចារណាលើ
- ទំនាក់ទំនងពីមុនរវាងបុគ្គលដែលធ្វើសំណើ និងអ្នកដែលទទួលសំណើ
- ទំនាក់ទនងវិជ្ជាជីវៈ ឬ ទំនាក់ទំនងដទៃទៀតរវាងបុគ្គលដែលធ្វើសំណើ និង អ្នកទទួលសំណើនោះ
- សេចក្តីប្រកាស ឬ អំពើរបស់បុគ្គលណាមួយដែលបង្ហាញថាខ្លួនចាប់អារម្មណ៍នឹងសំណើនោះ។
- សំណើលក់អញ្ញត្រកម្ម(Exempt Offer) សំដៅដល់សំណើលក់មូលបត្រជាសាធារណៈដោយមិនចាំបាច់បំពេញតាមលក្ខខណ្ឌនៃច្បាប់។ សំណើលក់អញ្ញត្រកម្មនេះមានចែងដោយអនុក្រឹត្យ ឬ ប្រកាស។
- អសាធនីយ(Insolvent) សំដៅដល់ការមិនមានប្រាក់គ្រប់គ្រាន់សម្រាប់ទូទាត់សងបំណុលដែលជំពាក់គេ។
- អ្នកវិនិយោគសាធារណៈ(Public Investor) សំដៅដល់សាធារណជននៅក្នុងព្រះរាជាណាចក្រកម្ពុជារួមទាំងរូបវន្តបុគ្គល និង នីតិបុគ្គលដែលមានសិទ្ធិទិញ ឬ លក់មូលបត្រដែលបានបោះផ្សាយ និង ធ្វើសំណើលក់ជាសាធារណៈក្នុងព្រះរាជាណាចក្រកម្ពុជា ដោយក្រុមហ៊ុនមហាជនទទួលត្រូវមានកម្រិត ឬ នីតិបុគ្គលប្រតិស្រុត ដែលមិនមែនជាសហការី ឬ ក្រុមហ៊ុនបុត្រសម្ព័ន្ធ ឬ នីតិបុគ្គលពាក់ព័ន្ធរបស់ក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលប្រតិស្រុតនោះ។
- អាជីវកម្មមូលបត្ររបស់បុគ្គលមួយ(Securities Business of Person) ត្រូវគិតទាំងសកម្មភាពដូចខាងក្រោម៖
- ការទិញ ឬ លក់មូលបត្រក្នុងនាមជាភ្នាក់ងាររបស់បុគ្គលផ្សេងទៀត។
- ការទិញ ឬ លក់មូលបត្រដោយប្រើប្រាស់មូលនិធិរបស់ខ្លួន និង ក្នុងនាមខ្លួនឯង។
- ការផ្តល់ប្រឹក្សាអំពីវិនិយោគមូលបត្រ ឬ ការបោះផ្សាយសេចក្តីវិភាគអំពីការវិនិយោគមូលបត្រជួនអ្នកវិនិយោគសាធារណៈ។
- ចុះកិច្ចព្រមព្រៀងធានា ជាមួយក្រុមហ៊ុនដែលធ្វើសំណើលក់ ឬ ទិញមូលបត្រ ឬ ចុះកិច្ចព្រមព្រៀងធានាទិញ ឬ លក់បន្ត។
- ឯកសារផ្តល់ព័ត៌មានជាប្រចាំ(Continuous Disclosure Document) សំដៅដល់ឯកសារផ្តល់ព័ត៌មានដែលពិពណ៌នាអំពីព្រឹត្តិការណ៍ ដែលកើតឡើងនៅពេលណាមួយក្នុងអាយុកាលរបស់ក្រុមហ៊ុនមហាជនទទួលខុសត្រូវមានកម្រិត ឬ នីតិបុគ្គលប្រតិស្រុត។
- ឯកសារផ្តល់ព័ត៌មាន(Disclosure Document) សំដៅដល់លិខិតជូនដំណឹង ឬ សេចក្តីប្រកាសជាលាយលក្ខណ៍អក្សរ ដែលអធិប្បាយអំពីប្រវត្តិក្រុមហ៊ុនរបាយការណ៍ហិរញ្ញវត្ថុ ឬ ជាការអញ្ជើញឲ្យទិញ ឬ សំណើឲ្យគេដាក់ពាក្យសុំទិញ ឬ ទិញមូលបត្រ ឬ ប្រកាសអំពីការដាក់លក់ ឬ ការលក់មូលបត្រ និង រាប់បញ្ចូលទាំងឯកសារផ្តល់ព័ត៌មានជាប្រចាំ ឬ ឯកសារផ្តល់ព័ត៌មានជំនួសផងដែរ។
- ឧបករណ៍និស្សន្ទ ឬឧបករណ៍ដេរីវេទីវ(Derivative Instrument) សំដៅដល់កិច្ចសន្យាដែលផ្តល់សិទ្ធិ ឬ កាតព្វកិច្ចនៃមូលបត្រដើមទៅឲ្យបុគ្គលណាមួយ ដោយរាប់បញ្ចូលទាំងសិទ្ធិ ឬ កាតព្វកិច្ចទិញលក់ ឬ ដាក់ពាក្យសុំទិញមូលបត្រក្នុងពេលអនាគត ដោយមិនគិតថាបុគ្គលនេះមានបំណងប្រើសិទ្ធិ ឬ មិនប្រើប្រាស់សិទ្ធិនេះក៏ដោយ។
ឯកសារយោង
គណៈកម្មការមូលបត្រកម្ពុជា Archived 2009-06-26 at the វេយប៊ែខ ម៉ាស៊ីន.