គណៈមេធាវីនៃព្រះរាជាណាចក្រកម្ពុជា
គណៈមេធាវីនៃព្រះរាជាណាចក្រកម្ពុជា ជាអង្គការប្រមូលផ្តុំមេធាវីទាំងអស់ ដែលតាំងការិយាល័យនៅក្នុងព្រះរាជាណាចក្រកម្ពុជា។ មេធាវីម្នាក់ៗ ត្រូវជាសមាជិកពេញសិទ្ធិនៃគណៈមេធាវី ក្រោយពីចុះឈ្មោះ ក្នុងគណៈមេធាវី ។ គណៈមេធាវីមិនស្ថិតនៅ ក្រោមគណបក្សនយោបាយណាមួយ ឬ អង្គការសាសនាណា ឬ អង្គការនានាផ្សេងទៀតឡើយ ។ការសម្តែងមនោគមន៏វិជ្ជា សាសនា ឬ នយោបាយ ត្រូវបានហាមឃាត់ ។ គណៈមេធាវីត្រូវបានដឹកនាំដោយប្រធានមួយ រូប និង គ្រប់គ្រងដោយក្រុមប្រឹក្សាគណៈមេធាវី។ ប្រធានគណៈមេធាវីត្រូវបានបោះឆ្នោតសម្រាប់អាណត្តិ ២ ឆ្នាំ អាណត្តិនោះអាចត្រូវបន្តតែមួយអាណត្តិទៀត ដោយវិធីបោះឆ្នោត និង សមាជិកក្រុមប្រឹក្សាគណៈមេធាវី ត្រូវបានបោះឆ្នោតជ្រើសតាំងសម្រាប់អាណត្តិ ៣ ឆ្នាំ ។
រចនាសម្ព័ន្ធ
ក្រោយ ពីការចូលកាន់តំណែងជាប្រធានគណៈមេធាវី អាណត្តិទី ៧ ប្រធានគណៈមេធាវី និង សមាជិកក្រុមប្រឹក្សាគណៈមេធាវី បានរៀបចំរចនាសម្ព័ន្ធ និង អង្គការលេខ សម្រាប់ដឹកនាំគណៈមេធាវីដូចខាងក្រោមៈ
- ប្រធាន
- ក្រុមប្រឹក្សាគណៈមេធាវី
- ក្រុមប្រឹក្សាផ្តល់យោបល់
- អគ្គលេខាធិការ
- ខុទ្ទកាល័យប្រធាន
- មជ្ឈមណ្ឌលបណ្តុះបណ្តាលវិជ្ជាជីវៈមេធាវី
- នាយកដ្ឋានការពារក្តីជួនជនក្រីក្រ
- នាយកដ្ឋានអធិការកិច្ច និង ដោះស្រាយវិវាទ
- នាយកដ្ឋានទំនាក់ទំនងជាតិ-អន្តរជាតិ និង ផ្សព្វផ្សាយ
- នាយកដ្ឋានគណនេយ្យ
- គណៈកម្មការជំនាញ
- ការិយាល័យរដ្ឋបាល
ប្រធានគណៈមេធាវីមានតួនាទី និងភារកិច្ចដូចខាងក្រោម ៖
-ជាអ្នកដឹកនាំគណៈមេធាវី -ជាអធិបតីនៃមហាសន្និបាតគណៈមេធាវីនិងក្រុមប្រឹក្សាគណៈមេធាវី -ជាអ្នកធានាផលប្រយោជន៍វិជ្ជាជីវៈ និងផលប្រយោជន៍របស់សមាជិកទាំងអស់ -ជាអ្នកផ្សះផ្សារ ហើយបើមានការចាំបាច់ និងតាមសំណើរបស់គូក្តី ធ្វើអាជ្ញាកណ្តាលក្នុងវិវាទដែលកើតឡើងរវាងមេធាវីនិងមេធាវី រវាងមេធាវី និងអតិថិជន -ជាតំណាងវិជ្ជាជីវៈមេធាវីចំពោះមុខតតិយជន និងអាជ្ញាធរសាធារណៈ -ជាតំណាងគណៈមេធាវីក្នុងរឿងក្តីដែលទាក់ទងគណៈមេធាវីក្រោយពីមានការអនុញ្ញាតពីក្រុមប្រឹក្សាគណៈមេធាវី ។ ក្នុងរយៈពេលកំណត់ណាមួយ ប្រធានគណៈមេធាវីអាចផ្ទេរអំណាចមួយផ្នែក ឬទាំងអស់ទៅឲ្យសមាជិកម្នាក់ ឬច្រើននាក់នៃក្រុមប្រឹក្សាគណៈមេធាវីបាន ។ ក្នុងករណីមានធុរៈ ប្រធានគណៈមេធាវីត្រូវជំនួសដោយសមាជិកនៃក្រុមប្រឹក្សាគណៈមេធាវីដែលមានវ័យចាស់ជាងគេ ។
- តួនាទីនិងភារកិច្ចរបស់ក្រុមប្រឹក្សាគណៈមេធាវី ក្រុមប្រឹក្សាគណៈមេធាវីពិនិត្យដោះស្រាយគ្រប់បញ្ហា ដែលពាក់ព័ន្ធទៅនឹងការអនុវត្តវិជ្ជាជីវៈមេធាវី ក្រុមប្រឹក្សាគណៈមេធាវីធានាការបំពេញភារកិច្ច និងការពារសិទ្ធិរបស់មេធាវី ។ ក្រុមប្រឹក្សាគណៈមេធាវីមានភារកិច្ចជាអាទិ៍ ដូចខាងក្រោម ៖
-ធ្វើបទបញ្ជាផ្ទៃក្នុង និងក្រមសីលធម៌ -សម្រេចឲ្យចុះឈ្មោះធ្វើកម្មសិក្សា និងចុះឈ្មោះក្នុងបញ្ជីឈ្មោះគណៈមេធាវី -សម្រេចលើការស្នើសុំអនុញ្ញាតទាំងឡាយដែលធ្វើឡើងដោយមេធាវី -ពិនិត្យកិច្ចព្រមព្រៀង និងឯកសារទាំងឡាយ ដែលមេធាវីមានភារកិច្ចត្រូវដាក់ឲ្យពិនិត្យ ហើយបញ្ចេញមតិណែនាំលើកិច្ចព្រមព្រៀង និងឯកសារទាំងនោះ -ត្រួតពិនិត្យការកាន់កាប់ទៀងទាត់នៃបញ្ជីគណនេយ្យរបស់មេធាវី -ធានាការគោរពវិន័យ និងការដាក់វិន័យ -ធានារ៉ាប់រងការរៀបចំ និងការគ្រប់គ្រងសេវាទូទៅរបស់គណៈមេធាវី -គ្រប់គ្រងទ្រព្យសម្បត្តិ និងថវិការបស់គណៈមេធាវី កំណត់ចំនួនទឹកប្រាក់ភាគទានរបស់មេធាវីម្នាក់ៗ និងបង់ប្រាក់ធានារួមសម្រាប់វិជ្ជាជីវៈមេធាវី ។ -គ្រប់គ្រងបេឡានៃមូលនិធិរបស់គណៈមេធាវី -បញ្ចេញមតិលើបញ្ហាទាំងឡាយដែលទាក់ទងលើវិស័យយុត្តិធម៌ និងសិទ្ធិរបស់មេធាវី ក្នុងវិស័យការពារ ជាអាទិ៍នៅពេលដែលមានការអញ្ជើញពីអាជ្ញាធរសាធារណៈ ។
ទីប្រឹក្សាប្រធានគណៈមេធាវី មានភារកិច្ចផ្តល់យោបល់លើបញ្ហាជាក់លាក់ណាមួយជូនប្រធានគណៈមេធាវី ទៅតាមការកំណត់របស់ប្រធានគណៈមេធាវី ។ អគ្គលេខាធិការដ្ឋាននៃគណៈមេធាវី ត្រូវដឹកនាំដោយអគ្គលេខាធិការមួយរូប និងមានអគ្គលេខាធិការរងមួយចំនួនជាជំនួយការ ។ អគ្គលេខាធិការដ្ឋានមានតួនាទី និងភារកិច្ចដូចខាងក្រោម៖
-គ្រប់គ្រងបុគ្គលិកទាំងអស់ ដែលធ្វើការនៅគណៈមេធាវី ដូចជាបុគ្គលិករដ្ឋបាល បុគ្គលិកគណនេយ្យ និងបុគ្គលិកនៅតាមនាយកដ្ឋានផ្សេងៗទៀត -ពិនិត្យតាមដានពេលម៉ោងធ្វើការរបស់បុគ្គលិក និងធ្វើសំណើជូនប្រធានគណៈមេធាវីដើម្បីដាក់ពិន័យទៅលើបុគ្គលិក ដែលមិនគោរពតាមបទបញ្ជាផ្ទៃក្នុង និងពេលម៉ោងធ្វើការ -រៀបចំរបាយការណ៍សកម្មភាពការងាររបស់គណៈមេធាវី ជូនប្រធានគណៈមេធាវី ដើម្បីដាក់ជូនមហាសន្និបាតគណៈមេធាវី -ព្រាងលិខិតស្នាម និងសេចក្តីសម្រេចផ្សេងៗ ជូនប្រធានគណៈមេធាវី ដើម្បីចុះហត្ថលេខា -រៀបចំរបាយការណ៍ជូនក្រុមប្រឹក្សាគណៈមេធាវី ជាប្រចាំអំពីសកម្មភាពរបស់គណៈមេធាវី -រៀបចំរបាយការណ៍គម្រោងស្នើសុំថវិកា ពីស្ថាប័នជាតិ និងអន្តរជាតិ -ពិនិត្យចំណូល-ចំណាយរបស់គណៈមេធាវី -ចូលរួមជាលេខាធិការកិច្ចប្រជុំក្រុមប្រឹក្សាគណៈមេធាវី -ពិនិត្យសកម្មភាពរបស់នាយកដ្ឋានដទៃទៀត -ធ្វើសកម្មភាពដទៃទៀតតាមការចាត់តាំងរបស់ប្រធានគណៈមេធាវី ។
មជ្ឈមណ្ឌលបណ្តុះបណ្តាលវិជ្ជាជីវៈមេធាវីត្រូវដឹកនាំដោយនាយកមួយរូប និងមានអគ្គលេខាធិការមួយរូបជាជំនួយការ ។ មជ្ឈមណ្ឌលបណ្តុះបណ្តាលវិជ្ជាជីវៈមេធាវីមានតួនាទី និងភារកិច្ចដូចខាងក្រោម ៖
-រៀបចំសេចក្តីព្រាងនីតិវិធីប្រឡងជ្រើសរើសឲ្យចូលរៀននៅមជ្ឈមណ្ឌលបណ្តុះបណ្តាលវិជ្ជាជីវៈមេធាវី និងប្រឡងយកវិញ្ញាបនបត្រសម្បទាខាងវិជ្ជាជីវៈមេធាវី -រៀបចំកម្មវិធីសិក្សា និងការជ្រើសរើសគ្រូបណ្តុះបណ្តាលជូនក្រុមប្រឹក្សាគណៈមេធាវីពិនិត្យសម្រេច -ធ្វើការបណ្តុះបណ្តាលវិជ្ជាជីវៈមេធាវីដល់សិស្សមេធាវី បណ្តុះបណ្តាលបន្ថែមដល់មេធាវីកម្មសិក្សារៀបចំវគ្គសុក្រឹត្យការដល់មេធាវីដែលកំពុងប្រកបវិជ្ជាជីវៈ -ធ្វើរបាយការណ៍ប្រចាំខែ ប្រចាំត្រីមាស ប្រចាំឆមាស និងប្រចាំឆ្នាំ ជូនប្រធានគណៈមេធាវី -ធ្វើរបាយការណ៍ហិរញ្ញវត្ថុប្រចាំឆមាសជូនក្រុមប្រឹក្សាគណៈមេធាវី -ធ្វើសកម្មភាពដទៃទៀតតាមការចាត់តាំងរបស់ប្រធានគណៈមេធាវី ។
ក្រុមការងារស្រាវជ្រាវ អប់រំ និងផ្សព្វផ្សាយច្បាប់ ត្រូវបានដឹកនាំដោយប្រធានក្រុមការងារមួយរូប និងមានអនុប្រធានមួយចំនួនជាជំនួយការ ។ សមាជិក សមាជិកាគណៈមេធាវី អាចចូលរួមក្នុងក្រុមការងារនេះដោយស្ម័គ្រចិត្ត ដើម្បីចូលរួមក្នុងការអភិវឌ្ឍវិស័យច្បាប់ និងយុត្តិធម៌ តាមរយៈការពិភាក្សាស្រាវជ្រាវ ធ្វើបទវិភាគពាក់ព័ន្ធនឹងវិស័យច្បាប់ណាមួយ ។ ក្រុមការងារនេះត្រូវបានបែងចែងជា អនុក្រុមការងារចំនួន ៤ ដែលមានតួនាទី និងភារកិច្ចដូចខាងក្រោម ៖ ក.អនុក្រុមកាងារក្នុងវិស័យរដ្ឋប្បវេណីមានតួនាទីនិងភារកិច្ចដូចខាងក្រោម ៖ -សិក្សាស្រាវជ្រាវច្បាប់ និងបទដ្ឋានគតិយុត្តពាក់ព័ន្ធវិស័យរដ្ឋប្បវេណី -ធ្វើការវិភាគបកស្រាយនូវខ្លឹមសារច្បាប់ និងបទដ្ឋានគតិយុត្តពាក់ព័ន្ធនឹងវិស័យរដ្ឋប្បវេណីសម្រាប់បោះពុម្ព ផ្សព្វផ្សាយលើព្រឹត្តិបត្រគណៈមេធាវី និងគេហទំព័រគណៈមេធាវី -ពិភាក្សារកចម្លើយ ដើម្បីឆ្លើយតបនឹងចម្ងល់នានារបស់មេធាវី និងសាធារណជន ពាក់ព័ន្ធនឹងខ្លឹមសារច្បាប់ក្នុងវិស័យរដ្ឋប្បវេណី -ពិភាក្សាលើប្រធានបទ និងសំណួរចម្លើយ ដើម្បីចូលរួមការផ្សព្វផ្សាយច្បាប់ពាក់ព័ន្ធវិស័យរដ្ឋប្បវេណីនៅតាមកម្មវិធី និងតាមបណ្តាញផ្សព្វផ្សាយនានា។ -ភារកិច្ចផ្សេងទៀតតាមការចាត់តាំងរបស់ប្រធានក្រុមការងារ ឬប្រធានគណៈមេធាវី ។ ខ.អនុក្រុមកាងារក្នុងវិស័យព្រហ្មទណ្ឌមានតួនាទីនិងភារកិច្ចដូចខាងក្រោម ៖ -សិក្សាស្រាវជ្រាវច្បាប់ និងបទដ្ឋានគតិយុត្តពាក់ព័ន្ធវិស័យព្រហ្មទណ្ឌ -ធ្វើការវិភាគបកស្រាយខ្លឹមសារច្បាប់ និងបទដ្ឋានគតិយុត្តពាក់ព័ន្ធនឹងវិស័យពាណិជ្ជកម្មសម្រាប់បោះពុម្ព ផ្សព្វផ្សាយលើព្រឹត្តិបត្រគណៈមេធាវី និងគេហទំព័រគណៈមេធាវី -ពិភាក្សារកចម្លើយ ដើម្បីឆ្លើយតបចម្ងល់នានារបស់មេធាវី និងសាធារណជន ពាក់ព័ន្ធនឹងខ្លឹមសារច្បាប់ក្នុងវិស័យព្រហ្មទណ្ឌ -ពិភាក្សាលើប្រធានបទ និងសំណួរចម្លើយដើម្បីចូលរួមការអប់រំផ្សព្វផ្សាយច្បាប់ពាក់ព័ន្ធនឹងវិស័យព្រហ្មទណ្ឌនៅតាមកម្មវិធីនិងតាមបណ្តាញផ្សព្វផ្សាយនានា ។ -ភារកិច្ចផ្សេងទៀតតាមការចាត់តាំងរបស់ប្រធានក្រុមការងារ ឬប្រធានគណៈមេធាវី ។ គ.អនុក្រុមការងារក្នុងវិស័យពាណិជ្ជកម្ម អនុក្រុមការងារក្នុងវិស័យពាណិជ្ជកម្មមានតួនាទី និងភារកិច្ចដូចខាងក្រោម ៖ -សិក្សាស្រាវជ្រាវច្បាប់ និងបទដ្ឋានគតិយុត្តពាក់ព័ន្ធវិស័យពាណិជ្ជកម្ម -ធ្វើការវិភាគបកស្រាយនូវខ្លឹមសារច្បាប់ និងបទដ្ឋានគតិយុត្តពាក់ព័ន្ធនឹងវិស័យពាណិជ្ជកម្មសម្រាប់បោះពុម្ព ផ្សព្វផ្សាយលើព្រឹត្តិបត្រគណៈមេធាវី និងគេហទំព័រគណៈមេធាវី -ពិភាក្សាចម្លើយ ដើម្បីឆ្លើយតបនឹងចម្ងល់នានារបស់មេធាវី និងសាធារណជន ពាក់ព័ន្ធនឹងខ្លឹមសារច្បាប់ក្នុងវិស័យពាណិជ្ជកម្ម -ពិភាក្សាលើប្រធានបទ និងសំណួរចម្លើយ ដើម្បីចូលរួមការអប់រំផ្សព្វផ្សាយច្បាប់ពាក់ព័ន្ធវិស័យពាណិជ្ជកម្មនៅតាមកម្មវិធីនិងតាមបណ្តាញផ្សព្វផ្សាយនានា -ភារកិច្ចផ្សេងទៀតតាមការចាត់តាំងរបស់ប្រធានក្រុមការងារ ឬប្រធានគណៈមេធាវី
ឯកសារយោង
- ដកស្រង់ចេញពីគេហទំព័រគណៈមេធាវីនៃព្រះរាជាណាចក្រកម្ពុជា Archived 2013-01-29 at the វេយប៊ែខ ម៉ាស៊ីន.