គណបក្សប្រជាធិបតេយ្យមូលដ្ឋាន

គណបក្សប្រជាធិបតេយ្យមូលដ្ឋាន Grassroots Democratic Party
ប្រធាន	លោក យ៉េង វិរៈ
ស្ថាបនិក	លោកបណ្ឌិត កែម ឡី , លោកបណ្ឌិត យ៉ង សាំងកុមារ, លោកបណ្ឌិត សាម អ៊ីន
បាវចនា	សាមគ្គីភាព យុត្តិធម៌ អហិង្សា
បង្កើត	០២ ខែសីហា ឆ្នាំ២០១៥
ទីស្នាក់ការកណ្ដាល	ផ្ទះលេខ A១៦E0, បុរីដើមមាស, ភូមិម័ល, សង្កាត់ដង្កោ, ខណ្ឌដង្កោ, រាជធានីភ្នំពេញ
សមាជិកភាព	១០.០០០
មនោគមវិជ្ជា	ជាតិនិយមខ្មែរ ប្រជាធិបតេយ្យមូលដ្ឋាន សង្គមសេរីនិយម
គោលជំហរនយោបាយ	កណ្ដាលឆ្វេងនិយម
ពណ៌ផ្លូវការ	បៃតង
ព្រឹទ្ធសភា	០ / ៦២
រដ្ឋសភា	០ / ១២៥
ឃុំ	០ / ១៦៤៦
ក្រុមប្រឹក្សាឃុំសង្កាត់	៥ / ១១៥៧២
រដ្ឋាភិបាលក្នុងស្រុក	០ / ៤១១៤
គេហទំព័រ
http://www.gdpcambodia.org/
នយោបាយនៅកម្ពុជា គណបក្សនយោបាយ ការបោះឆ្នោត

អំពី គណបក្សប្រជាធិបតេយ្យមូលដ្ឋាន (អង់គ្លេស៖ Grassroots Democratic Party ហៅកាត់: គបម) គឺជាគណបក្សមួយនៅប្រទេសកម្ពុជាដែលត្រូវបានបង្កើតឡើងនៅថ្ងៃទី០២ ខែសីហា ឆ្នាំ២០១៥។ គណបក្សនេះគឺត្រូវបានដឹកនាំដោយ លោក យ៉េង វីរៈ ជាប្រធានគណបក្ស លោក សេក សុខា ជាប្រធានគណៈកម្មាធិការនាយក និងលោកបណ្ឌិត វ៉ៃ ឡងឌី ជាអគ្គលេខាធិការ។ គណបក្ស​នេះ​ក៏​បាន​ចូលរួម​ប្រកួតប្រជែង​ក្នុង​ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨។

រូបត្រីកោណ

រូបត្រីកោណតំណាងឲ្យប្រជាធិបតេយ្យពីក្រោមមកលើ ដោយយកប្រជាពលរដ្ឋតាមមូលដ្ឋានជាធំ ដែលមានផ្ទៃខាងក្នុងពណ៌បៃតង ជ្រុងបាតពណ៌ក្រហម ជ្រុងទាំងសងខាងពណ៌ខៀវ និងអក្សរ "គបម" ពណ៌សនៅចំកណ្តាលផ្ទៃទាំងមូល។

ពណ៌ទាំង៤នៃរូបត្រីកោណ៖

• បៃតង តំណាងឲ្យ ធម្មជាតិ កសិកម្ម និងប្រជាធិបតេយ្យមូលដ្ឋាន

• ពណ៌ក្រហម តំណាងឲ្យ ការតស៊ូ ព្យាយាម និងយុត្តិធម៌

• ពណ៌ខៀវ តំណាងឲ្យ សិទ្ធិ សេរីភាព និងច្បាប់

• ពណ៌ស តំណាងឲ្យ តម្លាភាព ស្មោះត្រង់ និងសុចរិតភាព។

វេទិកា​គណបក្ស

គំនិតដើមនៃការបង្កើតគណបក្សប្រជាធិបតេយ្យមូលដ្ឋានមានដូចខាងក្រោម៖

• ការ​ប្រកួត​ប្រជែង​គ្នា​យ៉ាង​ខ្លាំង​រវាង​គណបក្ស​នយោបាយ​ធំ​ទាំង​ពីរ គឺ​គណបក្ស​ប្រជាជន​កម្ពុជា និងគណបក្ស​សង្គ្រោះ​ជាតិ ដែលបង្កើត​ឥទ្ធិពល​អវិជ្ជមាន​ដល់​បរិយាកាស​នយោបាយ និង​ដំណើរការ​ប្រជាធិបតេយ្យ​នៅ​កម្ពុជា។ មេដឹកនាំនយោបាយដែលមានស្រាប់ មានទំនោរផ្តោតលើការវាយប្រហារ ចោទ លាបពណ៌ ជេរ គំរាម និងលើការស្តីបន្ទោសគ្នាទៅវិញទៅមក ជាជាងលើការបង្កើតគោលនយោបាយសមស្រប ដើម្បីដោះស្រាយបញ្ហាសង្គម និងសេដ្ឋកិច្ចជាតិ។

• កង្វះវប្បធម៌ និងបរិយាកាសដែលអាចឱ្យប្រជាពលរដ្ឋកម្ពុជា ជាពិសេសយុវជន ស្ត្រី និងប្រជាពលរដ្ឋដែលមានការទទួលខុសត្រូវផ្សេងទៀត អាចចូលរួមយ៉ាងសកម្មក្នុងដំណើរការនយោបាយដោយគ្មានការភ័យខ្លាច និងការរើសអើង។
• មិនមានគណបក្សនយោបាយដែលមានយន្តការផ្ទៃក្នុងដែលអនុញ្ញាតឱ្យមានការចូលរួមដោយសេរី និងសកម្មពីសមាជិកទេ។ ជាទូទៅ គណបក្សនយោបាយទាំងអស់មានទំនោរក្នុងការប្រកាន់យកនូវវិធីសាស្ត្រអំណាចពីលើចុះក្រោម។

គោលនយោបាយ

សេដ្ឋកិច្ច និងការងារ

1. អ្នកសម្របសម្រួលអភិវឌ្ឍន៍កសិកម្មចំនួន ៥.០០០ នាក់នឹងធ្វើការជាមួយកសិករទូទាំងប្រទេសកម្ពុជាដើម្បីដោះស្រាយបញ្ហារួមមានៈ ការខ្វះខាតទឹក ទុន ទីផ្សារ និងបច្ចេកវិទ្យាសមស្រប។
2. សហគ្រាសធុនតូចមធ្យម (SMEs) ដែលបានចុះបញ្ជីនឹងមានលក្ខណៈសម្បត្តិគ្រប់គ្រាន់សម្រាប់ការលើកលែងពន្ធរយៈពេលប្រាំឆ្នាំ។ ការផ្តល់ប្រាក់កម្ចីឧបត្ថម្ភធនចំនួន ៦ ភាគរយក្នុងមួយឆ្នាំ នឹងមានសម្រាប់សហគ្រិន និងអ្នកនាំចេញកសិផល និងអាហារកែច្នៃក្នុងទីផ្សារកំពុងអភិវឌ្ឍន៍សម្រាប់ផលិតផលកម្ពុជា។
3. យុវជន​ដែល​ចង់​ចាប់​ផ្តើម​អាជីវកម្ម​ផ្ទាល់​ខ្លួន​នឹង​ទទួល​បាន​ដើម​ទុន​ចំនួន ១.២៥០ ដុល្លារ​អាមេរិក ព្រម​ទាំង​កម្ចី​ឧបត្ថម្ភ​ធន​រយៈ​ពេល​វែង។

សុខាភិបាល

1. ផែនការ​ថែទាំ​សុខភាព​ជា​សាកល​នឹង​ត្រូវ​បង្កើត​ឡើង​ក្នុង​តម្លៃ ៥០០ រៀល​ក្នុង​មួយ​ពលរដ្ឋ​ក្នុង​មួយ​ខែ (អាយុ ១៨ ដល់ ៦៥ ឆ្នាំ)
2. អភិវឌ្ឍមណ្ឌលសុខភាព និងមន្ទីរពេទ្យប្រកបដោយស្តង់ដារវិជ្ជាជីវៈខ្ពស់។ មន្ត្រីសុខាភិបាលទាំងអស់នឹងទទួលបានប្រាក់បៀវត្សរ៍អប្បបរមាចំនួន ៥០០ ដុល្លារអាមេរិកក្នុងមួយខែ។
3. ធានាឱ្យមានការអនុវត្តប្រកបដោយប្រសិទ្ធភាពនៃច្បាប់ និងបទប្បញ្ញត្តិសុវត្ថិភាពចំណីអាហារ

ការអប់រំ និងយុវជន

1. ភូមិនីមួយៗនឹងទទួលបាននូវសាលាមត្តេយ្យប្រកបដោយគុណភាព និងគ្រូបង្រៀនដែលមានសមត្ថភាព
2. សិស្សគ្រប់រូបនឹងមានសិទ្ធិទទួលបានប្រាក់កម្ចីសិក្សារហូតដល់ ១.២៥០ ដុល្លារអាមេរិកក្នុងមួយឆ្នាំ
3. សាលារៀន និងសាកលវិទ្យាល័យនឹងតម្រូវឲ្យមានស្តង់ដារវិជ្ជាជីវៈខ្ពស់ ហើយគ្រូបង្រៀនទាំងអស់នឹងទទួលបានប្រាក់បៀវត្សរ៍អប្បបរមា 500 ដុល្លារអាមេរិកក្នុងមួយខែ។

ការការពារសង្គម និងសុខុមាលភាព

1. ស្ត្រីគ្រប់រូបនឹងទទួលបាន ១២៥ ដុល្លារសម្រាប់ការសម្រាលកូននីមួយៗ
2. ប្រជាពលរដ្ឋដែលមានអាយុលើសពី ៦៥ ឆ្នាំនឹងទទួលបានប្រាក់សោធននិវត្តន៍ចំនួន ៣៧,៥០ ដុល្លារក្នុងមួយខែ
3. កម្មករនិយោជិតគ្រប់រូបនឹងមានសិទ្ធិទទួលបានអត្ថប្រយោជន៍អត់ការងារធ្វើរហូតដល់ ៥០ ភាគរយនៃប្រាក់ខែសម្រាប់រយៈពេលប្រាំខែ

សេវាសាធារណៈ និងអភិបាលកិច្ចតាមបែបប្រជាធិបតេយ្យ

1. សមាជិកសភាទាំងអស់ទទួលខុសត្រូវចំពោះប្រជាពលរដ្ឋ មិនមែនរដ្ឋាភិបាលទេ។
2. មន្ត្រីរដ្ឋាភិបាលទាំងអស់ត្រូវទទួលខុសត្រូវចំពោះប្រជាពលរដ្ឋ និងសមាជិកសភា (មន្ត្រីរដ្ឋាភិបាលល្អ)
3. ការចូលរួមរបស់ប្រជាពលរដ្ឋយ៉ាងសកម្មនឹងត្រូវបានលើកទឹកចិត្ត ដើម្បីធានាបាននូវការទទួលខុសត្រូវរបស់រដ្ឋាភិបាល និងសភា (ពលរដ្ឋល្អ)។

មនោគមវិជ្ជា

គណបក្សនេះ ផ្តល់អាទិភាពទៅលើប្រជាធិបតេយ្យបែបវិមជ្ឈការ ដោយបណ្តាញសង្គមខ្មែរដើម្បីខ្មែរបានផ្តួចផ្តើម គំនិតបង្កើតគណបក្សនយោបាយមួយតាមរយៈសមាជដំបូង។

គុណតម្លៃនៃគណបក្សប្រជាធិបតេយ្យមូលដ្ឋានមានដូចជា៖

• សាមគ្គីភាព
• យុត្តិធម៌
• អហិង្សា
• សេរីភាព
• សុចរិតភាព
• សាធារណរដ្ឋនិយម

ចក្ខុវិស័យរបស់គណបក្សគឺ “ប្រជាពលរដ្ឋកម្ពុជាទាំងអស់រស់នៅក្នុងសេចក្តីថ្លៃថ្នូរ ហើយប្រទេសមានអធិបតេយ្យភាពជាតិពេញលេញ”។បេសកកម្មរបស់គណបក្សគឺ “បណ្តុះអ្នកដឹកនាំល្អ និងកសាងមូលដ្ឋានប្រជាធិបតេយ្យសម្រាប់ជាតិទាំងមូល”។

គណបក្សបានអនុម័តគោលការណ៍ផ្ទៃក្នុងដូចខាងក្រោមៈ

• បើកចំហនិងស្ម័គ្រចិត្ត
• ប្រជាធិបតេយ្យសមាជិក
• វិមជ្ឈការ
• ការសម្របសម្រួល និងការកសាងសមត្ថភាពតួនាទីអ្នកដឹកនាំ
• ស្វ័យភាពហិរញ្ញវត្ថុ
• អនុញ្ញាតឱ្យមានការចូលរួមយ៉ាងសកម្មរបស់ស្រ្តី និងយុវជន

រចនាសម្ព័ន្ធជាតិនៃគណបក្សប្រជាធិបតេយ្យមូលដ្ឋានមាន៖

• មហាសន្និបាតដែលមានគណៈប្រតិភូរហូតដល់ ៣០០ នាក់។

• ក្រុមប្រឹក្សាភិបាលដែលមានប្រធានជ្រើសរើសដោយមហាសន្និបាត
• គណៈកម្មាធិការប្រតិបត្តិ ដែលមានប្រធានដែលត្រូវបានជ្រើសរើសដោយមហាសន្និបាត។ ប្រធានគណៈកម្មាធិការប្រតិបត្តិ ក៏ជាប្រធានផ្លូវការនៃគណបក្សផងដែរ។
• គណកម្មាធិការដោះស្រាយវិវាទ និងវិន័យ ជាមួយនឹងប្រធានដែលត្រូវបានជ្រើសរើសដោយមហាសន្និបាត

ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ ឆ្នាំ២០១៧

គណបក្សប្រជាធិបតេយ្យមូលដ្ឋានបានចូលរួមក្នុងការបោះឆ្នោតថ្នាក់មូលដ្ឋាននៅថ្ងៃទី ៣ ខែមិថុនា ឆ្នាំ ២០១៧ ដោយប្រកួតប្រជែងក្នុងឃុំចំនួន ២៧ ដោយទទួលបានអាសនៈចំនួន ៥ ក្នុងឃុំចំនួន ៣ ។

ក្រោយ​ការ​រំលាយ​គណបក្ស​សង្គ្រោះ​ជាតិ គណបក្សប្រជាធិបតេយ្យមូលដ្ឋានមិន​ទទួល​យក​ការ​បែងចែក​អាសនៈ​របស់​គណបក្ស​សង្គ្រោះ​ជាតិ​ឡើង​វិញ​ទេ។

ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨

គណបក្សប្រជាធិបតេយ្យមូលដ្ឋានគឺត្រូវបានចូលរួមក្នុងការបោះឆ្នោតជ្រើសតាំងតំណាងរាស្ត្រកាលដែលបានធ្វើឡើងនៅថ្ងៃទី ២៩ ខែកក្កដាឆ្នាំ ២០១៨ និងបានប្រកួតប្រជែងនៅក្នុងមណ្ឌលបោះឆ្នោតទាំងអស់ ២៥។ គណបក្សនេះបានបង្ហាញខ្លួនឯងថាជាជម្រើសថ្មី និងក្តីសង្ឃឹមថ្មីសម្រាប់ប្រជាជនកម្ពុជាទាំងអស់។

វេទិកានយោបាយរបស់ គបម ដែលមានគោលនយោបាយសំខាន់ៗចំនួន១២៥ដែលត្រូវបានបង្ហាញនៅក្នុង"សៀវភៅបៃតង" ។ គោលនយោបាយទាំង ១២៥ ត្រូវបានចាត់ថ្នាក់ជាគោលនយោបាយបង្រួបបង្រួមជាតិ និងឯកភាពជាតិ គោលនយោបាយកសាងជាតិ គោលនយោបាយការពារ និងសន្តិសុខជាតិ និងគោលនយោបាយសហប្រតិបត្តិការអន្តរជាតិ។ ជាផ្នែកមួយនៃការផ្សះផ្សាជាតិ និងការឯកភាពជាតិ គបម មានគោលបំណងបង្កើតរដ្ឋាភិបាលសាមគ្គីភាព ដោយអញ្ជើញគណបក្សនយោបាយទាំងអស់ដែលមានអាសនៈរដ្ឋសភាមកបង្កើតក្រុមប្រឹក្សាកសាងជាតិទំនើប ដោយអញ្ជើញអតីតមេដឹកនាំនយោបាយកំពូលៗទាំងអស់ជាសមាជិក។

សម្រាប់យុទ្ធនាការបោះឆ្នោតក្នុងចំណោមប្រជាជនទូទៅ គបម បានសង្ខេបគោលនយោបាយកសាងប្រទេសជាតិសំខាន់ៗជាទម្រង់ក្នុងមួយទំព័រ ដែលត្រូវបានគេស្គាល់ថាជាគោលនយោបាយ ស ៥ ដែលជាអក្សរកាត់ខ្មែរសម្រាប់វិស័យចំនួនប្រាំរួមមានៈ សេដ្ឋកិច្ច និងការងារ សុខាភិបាល អប់រំ និងយុវជន សុខុមាលភាពសង្គម និងសេវាសាធារណៈ និងអភិបាលកិច្ចតាមបែបប្រជាធិបតេយ្យ។

គណបក្សប្រជាធិបតេយ្យមូលដ្ឋានទទួលបានសំឡេងគាំទ្រចំនួន ៧០.២៩១ ឬ ១,១១% នៃការបោះឆ្នោតជ្រើសតាំងតំណាងរាស្ត្រកាលពីថ្ងៃទី ២៩ ខែកក្កដា ឆ្នាំ ២០១៨ ប៉ុន្តែមិន​គ្រប់គ្រាន់ដើម្បីឈ្នះអាសនៈមួយក្នុងរដ្ឋសភាកម្ពុជា។

លទ្ធផលបោះឆ្នោត

ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨

បោះឆ្នោត	ប្រធានគណបក្ស	សំឡេងគាំទ្រ			អាសនៈ		ទីតាំង	រដ្ឋាភិបាល
		#	%	±	#	±
២០១៨	លោក យ៉េង វិរៈ	៧០.៥៦៧	១,១១	១,១១	០ / ១២៥		ទី៦	CPP

ការបោះឆ្នោតជ្រើសរើសក្រុមប្រឹក្សា ឃុំ សង្កាត់ ឆ្នាំ២០១៧

បោះឆ្នោត	ប្រធានគណបក្ស	សំឡេងគាំទ្រ			ឃុំ		ក្រុមប្រឹក្សាឃុំសង្កាត់		ទីតាំង
		#	%	±	#	±	#	±
២០១៧	លោក យ៉េង វិរៈ	៤.៩៨១	០,០៧	០,០៧	០ / ១៦៤៦		៥ / ១១៥៧២	៥	ទី៧