ពហុកីឡដ្ឋានជាតិអូឡាំពិក
| ពហុកីឡាដ្ឋានជាតិអូឡាំពិក | |
|---|---|
| |
| ឈ្មោះពេញ | ពហុកីឡាដ្ឋានជាតិអូឡាំពិក |
| ទីតាំង | ភ្នំពេញ,  កម្ពុជា
|
| កូអរដោនេ | 11°33′30.1″N 104°54′43.5″E / 11.558361°N 104.912083°E |
| សាងសង់ | ១៩៦៣ ដល់ ១៩៦៤ |
| សម្ភោធ | ១៩៦៤ |
| ជួសជុល | ២០០០ |
| ម្ចាស់ | រដ្ឋ |
| ស្ថាបត្យករ | វណ្ណ មូលីវណ្ណ |
| ម្ចាស់ផ្ទះក្រុម | ក្រុមកីឡាករជំរើសជាតិកម្ពុជា |
| ចំនុះ | ៥០០០០ កៅអី |
ពហុកីឡាដ្ឋានជាតិអូឡាំពិក មានទីតាំងនៅចំកណ្ដាលទីក្រុងភ្នំពេញ។ ពហុកីឡាដ្ឋានមានលទ្ឋភាពទទួលទស្សនិកជនបានប្រមាណ៥ម៉ឺននាក់។ វាត្រូវបានគូរប្លង់ដោយស្ថាបត្យករខ្មែរដ៏ល្បីគឺលោក វណ្ណ មូលីវណ្ណ។
ការស្ថាបនាពហុកីឡាដ្ឋានចាប់ផ្ដើមនៅឆ្នាំ ១៩៦៣ និងបញ្ចប់នៅឆ្នាំ ១៩៦៤។ ពិធីសម្ពោធធ្វើឡើងនៅថ្ងៃទី ១២ ធ្នូ ១៩៦៤ ដំនាលគ្នានឹង បុរីកីឡាដែរ ពហុកីឡាដ្ឋាននេះត្រូវបានស្ថាបនាដើម្បីត្រៀមធ្វើជាម្ចាស់ផ្ទះព្រឹត្តិការណ៍ កីឡាឧបទ្វីបអាស៊ីអាគ្នេយ៍ (បច្ចុប្បន្នបានប្ដូរឈ្មោះជាកីឡាអាស៊ីអាគ្នេយ៍ ឬ ស៊ីហ្គេម (SEA GAME)) ឆ្នាំ ១៩៦៣ ប៉ុន្តែព្រឹត្តិការណ៍នេះត្រូវបានលុបចោលទៅវិញដោយសារបញ្ហានយោបាយនៅកម្ពុជា។ ពហុកីឡាដ្ឋាននេះក៏បានទទួលប្រារព្ឋការប្រកួតកីឡាហ្គានេហ្វូផងដែរ ចាប់ពីថ្ងៃទី២៥ វិច្ឆិកា ដល់ថ្ងៃទី៦ធ្នូ ១៩៦៦ ដោយអោយឈ្មោះព្រឹត្តិការណ៍នោះថា កីឡាហ្គានេហ្វូលើកទី១។ ពហុកីឡាដ្ឋានត្រូវបានប្រើប្រាស់ជាកន្លែងទទួលស្វាគមន៍ប្រមុខរដ្ឋនៃបណ្ដាប្រទេសជាមិត្តមួយចំនួន ជាកន្លែងប្រារព្ឋពិធីផ្សេងៗរបស់រដ្ឋ និងជាកន្លែងហ្វឹកហ្វឺនក្រុមកីឡាករជម្រើសជាតិកម្ពុជា។
ពហុកីឡាដ្ឋានបានរួមចំនែកតូចមួយក្នុងការប្រកួតបាល់ទាត់ពានរង្វាន់ពិភពលោកឆ្នាំ ១៩៦៦ (1966 FIFA World Cup) នៅក្នុងការប្រកួតជម្រុះរវាងកូរ៉េខាងជើងនិងអូស្ត្រាលី។ នៅពេលនោះទំនាក់ទំនងអន្តរជាតិរបស់កូរ៉េខាងជើងជាមួយប្រទេសភាគច្រើនមិនសូវល្អ គេមានការលំបាកយ៉ាងខ្លាំងក្នុងការរកទីកន្លែងប្រកួតឲ្យបានសមស្រប។ ពេលនោះ ប្រមុខរដ្ឋសម្ដេចនរោត្តម សីហនុ ដែលជាមិត្តជាមួយមេដឹកនាំកូរ៉េខាងជើងគីម អ៊ីលស៊ុង បានស្នើថា ការប្រកួតនេះអាចធ្វើនៅភ្នំពេញបាន។ ការប្រកួតទាក់ទាញទស្សនិកជនបាន៤ម៉ឺននាក់ ដែលក្នុងនោះ ពាក់កណ្ដាលគាំទ្រអូស្ត្រាលី ហើយពាក់កណ្ដាលទៀតគាំទ្រកូរ៉េខាងជើង។ ការប្រកួតប្រព្រឹត្តទៅ២ថ្ងៃ គឺនៅថ្ងៃទី ២១ វិច្ឆិកា ១៩៦៥ ដែលលទ្ឋផលអូស្ត្រាលីឈ្នះ៦ទល់១ និង នៅថ្ងៃទី ២៤ វិច្ឆិកា ១៩៦៥ ដែលកូរ៉េខាងជើងឈ្នះ៣ទល់១។ កូរ៉េខាងជើងបានជាប់ឡើងទៅប្រកួតជាមួយអ៊ីតាលីនៅវគ្គប្រកួតវិលជុំ។ កូរ៉េខាងជើងបានឈ្នះអ៊ីតាលីទៀត ហើយឡើងទៅប្រកួតជាមួយព័រទុយហ្គាល់នៅវគ្គមួយភាគបួនផ្ដាច់ព្រាត់ តែចាញ់ព័រទុយហ្គាល់នៅពេលនោះទៅ។
នៅសម័យខ្មែរក្រហម ពហុកីឡាដ្ឋាននេះបានក្លាយជាគុកសម្រាប់មន្ត្រីរដ្ឋបាលនៅសម័យលន់ នល់។
ពហុកីឡាដ្ឋានបានស្ថិតនៅក្នុងសភាពទ្រុឌទ្រោមរាប់ទសវត្សរ៍ក្រោយមក។ នៅឆ្នាំ២០០០ ពហុកីឡាដ្ឋានត្រូវបានអភិវឌ្ឍជួសជុលឡើងវិញដោយក្រុមហ៊ុន Yuanta Group របស់តៃវ៉ាន់។ ក្រុមហ៊ុនបានជួសជុលពហុកីឡាដ្ឋាន តែបានសាងសង់ផ្ទះល្វែង និងស្តង់លក់ទំនិញនៅជុំវិញ ដែលការណ៍នេះបានទទួលការរិះគន់យ៉ាងខ្លាំងពីសាធារណជនទូទៅ។
ចាប់ពីឆ្នាំ២០០៧ ពហុកីឡាដ្ឋានជាទីចាប់អារម្មណ៍របស់ប្រជាពលរដ្ឋក្រុងភ្នំពេញ ដែលតែងតែមកហាត់ប្រាណ ក៏ដូចជាមកលេងកីឡាបាល់ទាត់ និងសកម្មភាពកីឡាផ្សេងៗទៀតជារៀងរាល់ថ្ងៃ។
នៅខែវិច្ឆិកា-ធ្នូ ២០០៧ អង្គការកីឡាបាល់ទះជនពិការពិភពលោកបានប្រារព្ធការប្រកួតពានរង្វាន់ពិភពលោករបស់ខ្លួននៅពហុកីឡាដ្ឋាននេះ។ នេះជាលើកទីមួយហើយដែលប្រទេសកម្ពុជាធ្វើជាម្ចាស់ផ្ទះក្នុងព្រឹត្តិការណ៍កីឡាអន្តរជាតិដ៏ធំ ក្នុងរយៈពេលជាង៤០ឆ្នាំចុងក្រោយនេះ។
