វិគីភីឌា:សសរស្តម្ភទាំងប្រាំ
គោលការណ៍ជាមូលដ្ឋាននៃ វិគីភីឌា អាចត្រូវបានសង្ខេបជា " សសរស្តម្ភ " ចំនួនប្រាំ (គោលការណ៍):
វិគីភីឌាគឺជាសព្វវចនាធិប្បាយ
វិគីភីឌា រួមបញ្ចូលគ្នានូវសព្វវចនាធិប្បាយដែលមានលក្ខណៈទូទៅនិងឯកទេស រួមទាំងឯកសារព្រឹត្តិការណ៍និងភូមិសាស្ត្រនានា។ វិគីភីឌាមិនមែន ជាកន្លែងរញ៉េរញ៉ៃ, វេទិកាផ្សាយពាណិជ្ជកម្ម, សារព័ត៌មានឥតប្រយោជន៍, ការពិសោធអំពីអនាធិបតេយ្យ ឬ ប្រជាធិបតេយ្យ,ការប្រមូលផ្ដុំព័ត៌មានមិនរើសមុខ ឬ កន្លែងប្រមូលផ្ដុំតំណគេហទំព័រ នោះទេ។ វាក៏មិនមែនជាវចនានុក្រម, កាសែត, ឬ បណ្ដុំប្រភពឯកសារណាមួយ បើទោះបីជា គម្រោងមួយចំនួនរបស់វិគីភីឌាធ្វើដូច្នេះក៏ដោយ។
វិគីភីឌាត្រូវបានសរសេរតាមទស្សនៈអព្យាក្រឹត
យើងខិតខំស្វែងរកអត្ថបទដែលមិនលំអៀង ដែលចងក្រងនិងពន្យល់អំពីទស្សនៈសំខាន់ៗនានា ដោយផ្តល់ទម្ងន់ទៅលើសារៈសំខាន់របស់វា។ យើងជៀសវាងការតស៊ូមតិ ដោយយើងកំណត់លក្ខណៈរបស់ព័ត៌មាននិងបញ្ហា ជំនួសឱ្យការជជែកវែកញែក។ នៅក្នុងផ្នែកខ្លះ អាចមានត្រឹមតែទស្សនៈមួយដែលមានគេទទួលស្គាល់ ខណៈដែលក្នុងផ្នែកខ្លះទៀត ពួកយើងរៀបរាប់អំពីទស្សនៈផ្សេងៗ ដោយលើកឡើងអំពីសុក្រឹតភាពនៃទស្សនៈនីមួយៗនោះទៅតាមបរិបទ ជាជាងផ្អែកលើ "ការពីត" ឬ "ការយល់ឃើញដ៏ល្អ"។ អត្ថបទ ទាំងអស់ត្រូវសរសេរឱ្យបានត្រឹមត្រូវ ហ្មត់ចត់ដែលដកស្រង់ចេញពីប្រភពដែលអាចទុកចិត្តបាន និងទទួលការអនុញ្ញាត ជាពិសេសចំពោះប្រធានបទដែលមានភាពចម្រូងចម្រាស ឬនិយាយអំពីមនុស្សនៅមានជីវិត។ វិគីភីឌា មិនអនុញ្ញាតឱ្យអ្នកសរសេរ បង្ហាញអំពីបទពិសោធន៍ ការបកស្រាយ ឬមតិផ្ទាល់ខ្លួនឡើយ។
វិគីភីឌាគឺជាមាតិកាសេរីដែលនរណាម្នាក់ក៏អាចប្រើកែសម្រួល និងចែកចាយបាន
ដោយសារតែអ្នកកែសម្រួលទាំងអស់ អាចចូលរួមធ្វើការងាររបស់ពួកគេដោយសេរី ដូច្នេះគ្មានអ្នកកែសម្រួលណាម្នាក់ ជាម្ចាស់នៃអត្ថបទណាមួយឡើយ ហើយរាល់អត្ថបទដែលបានចូលរួមណាមួយក៏ដោយ ក៏អាចត្រូវបានកែសម្រួល និង ចែកចាយឡើងវិញដោយសេរីដែរ។ ត្រូវគោរពច្បាប់កម្មសិទ្ធិបញ្ញា ហើយមិនត្រូវលួចចម្លងពីប្រភពណាមួយឡើយ។ ការប្រើប្រាស់ប្រភពព័ត៌មានពីប្រព័ន្ធផ្សព្វផ្សាយមិនសេរី ជួនកាលត្រូវបានអនុញ្ញាតឱ្យប្រើប្រាស់ដោយសមរម្យតាមការគួរ ប៉ុន្តែសូមព្យាយាមស្វែងរកប្រភពព័ត៌មានចេញពីប្រព័ន្ធផ្សព្វផ្សាយសេរី។
អ្នកកែសម្រួលវិគីភីឌាគួរតែគោរពចំពោះគ្នាទៅវិញទៅមកដោយសុជីវធម៌
ត្រូវគោរពអ្នកកែសម្រួលវិគីភីឌាដទៃទៀត ទោះបីជានៅពេលអ្នកមិនយល់ស្របគ្នាក៏ដោយ។ ត្រូវអនុវត្តក្រមសីលធម៌វិគីភីឌា ហើយមិនត្រូវបញ្ចូលការវាយប្រហារផ្ទាល់ខ្លួន។ សូមស្វែងរក ឯកភាព និងជៀសវាងជម្លោះនៃការកែសម្រួល ហើយសូមកុំប្រើវិគីភីឌាជាសមរភូមិប្រយុទ្ធ។ ត្រូវអនុវត្តដោយសេចក្តីស្មោះត្រង់ ហើយជឿជាក់លើសេចក្តីស្មោះត្រង់របស់អ្នកដទៃ។ ចូរបើកចិត្តឱ្យទូលាយ និងស្វាគមន៍ចំពោះអ្នកកែសម្រួលថ្មី។ ប្រសិនបើជម្លោះកើតមានឡើង សូមពិភាក្សាដោយស្ងប់ស្ងាត់នៅលើទំព័រពិភាក្សាដែលសមស្រប និងអនុវត្តតាមនីតិវិធីដោះស្រាយវិវាទ ហើយពិចារណាថាមានអត្ថបទជាភាសាខ្មែររាប់ពាន់ ផ្សេងទៀតនៅលើវិគីភីឌាដែលត្រូវកែលម្អ និងពិភាក្សា។
វិគីភីឌាគ្មានបទបញ្ញត្តិច្បាស់លាស់ទេ
វិគីភីឌាមានបទបញ្ញត្តិ និងការណែនាំ ប៉ុន្តែមិនបានចងក្រងច្បាស់លាស់ទេ។ ខ្លឹមសារ និងការបកស្រាយនៃបទបញ្ញត្តិ និងការណែនាំទាំងនោះអាចប្រែប្រួលតាមពេលវេលា។ គោលការណ៍ និងស្មារតីមានសារៈសំខាន់ជាងពាក្យពេចន៍ ហើយជួនកាលការកែលម្អលើវិគីភីឌាក៏ត្រូវមានការលើកលែងដែរ។ ចូរមានភាពក្លាហាន ប៉ុន្តែមិនធ្វេសប្រហែសក្នុងការធ្វើបច្ចុប្បន្នភាពលើអត្ថបទ។ សូមកុំធុញថប់នឹងការធ្វើខុស៖ (ស្ទើរតែ) រាល់កំណែអត្ថបទមុនៗ នៃទំព័រនីមួយៗត្រូវបានរក្សាទុក ដូច្នេះកំហុសអាចកែតម្រូវឡើងវិញយ៉ាងងាយស្រួល។