Interfejs

Jako interfejs (jendź.: interface) jedneho komputeroweho systema woznamjenja so powšitkownje wšitke wot wonka trěbne a wšitke wot wonka wotwołace wulkosće, kaž tež powšitkowne informacije wo wužiwanju systema. W kóždym systemje eksistuja wšelake interfejsy mjez wšelakimi dźělnymi systemami a funkciskimi jednotami. Jednotliwje dźěłace funkciske jednoty (kaž na př. składowak, tastatura, proceso atd.) su z pomocu hardwarowych interfejsow mjezsobu zwjazani. Pri tym jedna so wo fyzikaliske tykački (kable) abo wo škričkowe zwiski. Hardwarowy interfejs wopisa so často přez swóju kajkosć přenošowanskej čary (kabl, tykačka atd.) a přez wašnje a woznam na elektroniskim wodźe přenošowanych signalow.

Pod hardwaro-softwarowym-interfejsom zrozumi so postajenje, kajke funkcije ličaka so wot hardwary a kajke wot softwary přewozmu, kak so tute funkcije wužiwaja a kak so wotwołać hodźa.

Softwarowe interfejsy definuja so mjez programami a w programěrowanju mjez programowymi dźělami (modulami). K tomu so wšitke nadawki, kotrež modul spjelni, wšitke trěbne atributy, funkcije a parametry, wotwołanske móžnosće datow a jich wzajomne poćahi, rjad jich wužiwanja, předwuměnjenja atd. sformuluja. Interfejs zapřija wšitke wot zwonka widźomne informacije wo modulu. Specifikacija tajkich interfejsow zmóžnja při naćisku softwary njewotwisne implmentowanje programowych dźělow, woloži wužiwanje a pytanje za zmylkami a je wuměnjenje za aktualizowanje programowych systemow (softwarowa technika).

Čłowjekow-mašinowy-interfejs, tež wužiwarski interfejs mjenowany, zapřija rěče, softwaru a hardwaru, kotrež wužiwarjej k dźěle ze komputerowym systemom k dispoziciji steja. Tute móža so za wšelakich wužiwarjow wšelako postajić: tak ma na př. administrator jedneho systema wjace funkcije k wuběrkej hać normalne wužiwarjo. To rěka, zo definuje wužiwarski interfejs wužiwarski wid na system.

K pisanju interfejsow wužiwaja so specifikowanske rěče a datowe typy.