Wikipedia:Tutorial/4
 |
Wikipedia-Tutorial | |
|---|---|---|
| 1. Bearbeitige mache | 2. Teggschtgstaltig | 3. Bilder yybaue | 4. Syte neu aalege | 5. Diskussionssyte | 6. Schlusspunkt |
Artikel schrybe
Wenn dr Interässe häsch, an de Wikipedia mitzschaffe, no stellt sich dir d Frog, wie und wo.
Zerscht ändre …
Mr rote unsere Neuling, langsam loszlege. Süechet euch e Themegebiet, wo euch interessiert, läset d Artikel, wo's scho hät, spicket in de dütsche Wikipedia. Klicket euch dure. Ehner friehner wie spöter werret r e Stell finde, wo r öbbis ergänze, ändere oder korrigiere wän. Dänn los! Durchs Alüege vom Artikel und s Läse vom Quälltekscht - eso heißt de Tekscht, wo im Bearbeitigsfänschter erschynt - lehrt mer schnäll, wie d Artikel in de Wikipedia usseh solle.
E chleiner Hywys: De Quälltekscht vo mänke Artikel siht uff de erscht Blick zimlig kompliziert us. Des litt aber dra, dass in de Artikel Tabälle und Vorlage dinne ßin; d Art, wie sälli "gschrybe" werre, isch gwöhnigsbedürftig. Dodevo sott mer sich aber nit abschrecke lo! Eifach im Bearbeitigsfänschter witer noch unde rolle. Deno chunnt de eigetlig Artikeltekscht, wo vyl lychter läs- und änderbar isch.
... und ball Neus schrybe
Uff de andere Site wott mer aber au gern öbbis Neus schrybe. Einer vo de hüfigste Afängerfehler isch es, in churzer Zit fümf oder zäh neui Artikel z schrybe, wo numme uss e baar Wörter bstönn. Deno bassiert's, dass de Artikel als Stumpe kännzeichnet wird und spöter villicht sogar glöscht wird.
E neuer Artikel sott scho e bitz Qualität ha: De Fustregle noch mindestens 5 Sätz (lüeg Wikipedia:Artikel zu de Mindestaforderige). Vor allem sott mer immer ganzi Sätz schrybe. De erscht Satz müeß de Begriff enthalte, wo durch de Artikel erchlärt werre soll. Mit Artikel wie "Wikipedia: isch e Internetenzyklopädy" isch leider nit vyl ghulfe und s Kopiere vo Diplomarbete isch meistens au nit so güet: Dini Großmüeter sott no öbbis demit afange chönne.
Meh zum Thema
Zerscht emol yläse und warmschrybe. Wenn r dänn mit neue Artikel loslege wän: Ganz vyli Artikel, wo fehle und erwünscht ßin, git's under Artikel wo fehle. Immer dra dänke: Wirklig e Artikel dezüe schrybe, nit numme drei Wörter!