Вітольд Гінэль

Вітольд Гінэль
польск.: Witold Ginel
Дата нараджэння	15 чэрвеня 1918(1918-06-15)
Дата смерці	8 снежня 1969(1969-12-08) (51 год)

Вітольд Гінэль (польск.: Witold Ginel; 15 чэрвеня 1918 — 8 снежня 1969) — польскі ўрач-гінеколаг, доктар медыцынскіх навук.

Біяграфія

Нарадзіўся ў 1918 годзе ў вёсцы Зяняпішы (зараз — Шчучынскі раён). Навучаўся ў Віленскім езуіцкім калегіуме^{[удакладніць]}. Скончыў двухгадовы курс навучання ў вайсковай школе падхарунжых рэзерву. У 1938 годзе паступіў на медыцынскі факультэт Віленскага ўніверсітэта.

З пачаткам Другой сусветнай вайны быў мабілізаваны ў войска, браў удзел у ваенных дзеяннях. Пасля акупацыі Польшчы здолеў перабрацца ў Коўна, дзе працягнуў вучобу на медыцынскім факультэце. Пасля нападу Германіі на СССР вяртаецца ў родныя мясціны.

З 1942 года актыўна супрацоўнічае з падполлем. Трапіў у рукі гестапаўцаў, але здолеў уцячы. Уступіў у першы батальён 77-га пяхотнага палка Арміі Краёвай. Удзельнічаў у няўдалай спробе апанавання Шчучына польскімі партызанамі ў красавіку і ў бітве за Вільню ў ліпені 1944 года.

Пасля вайны рэпатраваўся ў Польшчу, дзе ў 1948 годзе скончыў медыцынскі факультэт у Познані.

Пасля службы ў войску ў 1952 годзе быў накіраваны на працу ў Граева, дзе ўзначаліў акушэрска-гінекалагічнае аддзяленне шпіталя. Адначасова цягам 11 гадоў кіраваў мясцовым аддзелам здароўя і сацыяльнай апекі.

У 1962 годзе абараніў доктарскую дысертацыю.

Памёр раптоўна на працоўным месцы у 1969 годзе.

Прызнанне

Быў узнагароджаны Крыжам Валечных, Залатым і Срэбраным Крыжамі Заслугі.

Імя Вітольда Гінэля з 1993 года носіць Граеўскі шпіталь.